娛樂版報道七旬倫伯與歌星友人，開酒慶奔七，隔住餐廳玻璃，讀者不能夠滋味（像極了蔡若蓮）。限聚令下咁高調，又唔怪得，與PK食過一餐明星唱K飯，得到PK手指公的讚，後台堅硬，奔七飯聚，使鬼理竹君BB唉聲歎氣咁話：咁…又係幾多姿多采。老人院感染猝逝者也有倫伯的同輩，但同遮唔同柄，家屬無得比較。
慶奔七，夾啱鐘數，鄭市長同日宣告，火眼實驗室下月一號正式開爐，風風火火，誓要幫五百萬+香港市民抽出無症狀感染者，火攻那條紅色的隱形傳播鏈。有國家隊照住，倫伯一族，放生病毒，陽性也安心。亞博臨時醫院由中央包底，開幕特惠領先兩間超市，讓城中所有七字頭藍絲，先住先吉祥。健康碼自自然然食住上，阿倫與阿叻幫政府出廣告，搵埋姓何的律師，專幫人搞碼。撞人那位的哥申請，免手續費兼有錢收。開槍交警真漢子，俾多柒個碼佢，任掃！想學一哥轉按嗎？冇碼不行，所以，爆痱滋都要去撩吊鐘。我建議從不洗碗的鄭市長，別再煩小鳳姐，倫伯那首潘源良填詞的「半夢半醒」歌詞呢句更啱你：「這刻可否不經意的問句你，夢裏可是孤單隻影？」