每個年代都總有童星，令觀眾留下深刻印象，要數千禧年後的代表，大家一定會認得曾參演過《巨輪》、《法證先鋒II》等36齣劇集的吳諾弘；而90年代呢？亞視經典劇《我和殭屍有個約會》系列的「殭屍仔」張國權，絕對是陪伴着很多人成長的集體回憶。時光荏苒，前者現在已是劍擊香港代表選手；後者現在已年屆31，當了人夫6年，大個仔了。
曾是亞視御用童星的張國權（Daniel），今年已經31歲，現職名店的銷售員，6年前已經結婚娶妻，不少人都會猜測，是否奉子成婚，但實情至今他仍享受跟太太過二人世界。「我哋都算早婚，好多人都問我，會唔會未玩夠？我就冇後悔過，而且同太太相處得好好，不過𠵱家嘅環境，生小朋友都係睇定啲先。」他與太太認識於朋友的生日會上，Daniel表示那時雙方剛與前度分手，兩顆寂寞的心剛好遇上。「難得大家有共同嘅想法，想搵結婚對象。」
Daniel大約6、7歲開始，在亞視度過了童星生涯，尤與《我和殭屍》的尹天照和萬綺雯（蚊蚊）特別投緣，兩人直情當他如契仔。「佢哋個個都好錫我，記得有次開工，蚊蚊好認真、好惡咁鬧我，我驚到走返入化妝間，點知入面熄咗燈，原來佢哋送驚喜畀我，搞咗個生日會，好難忘！」
直到《我》劇的第三輯時，他已經15歲，正值青春期。「呢個歲數係尷尬年齡，所以之後就冇做。」離開演藝圈，Daniel重過平凡生活，完成學業後便步入社會工作，問他有沒有心動再踏入演藝圈？他說︰「我嘅心態一向好被動，想拍又好冇方向。有年HKTV開台要招募演員，我做過童星有啲信心，去咗面試，隔幾日就通知我簽約，本來好開心，但後來開唔到台，我都好無奈。」可見他不是沒想過重返幕前，始終《我》劇帶給Daniel不少成長回憶，在他心中最期望的，就是《我》劇將來能開拍第四輯，可以跟契媽萬綺雯和契爺尹天照再合作。
至於曾在無綫當了10年童星的吳諾弘（Lawrence），參演過《On Call 36小時》、《心花放》、《巨輪》等36部劇集，今年他已20歲了，身份已變成為港隊劍擊運動員，甚至已取得入圍今屆東京奧運會資格。他自小學時參加課外活動，就開展劍擊生涯。「以前我脾氣麻麻、好躁底，後來學咗劍擊，訓練到我要冷靜思考，改變咗我好多。」Lawrence在中、小學參加劍擊比賽，拿過不少獎項，到他在拔萃男校讀中五時，毅然選擇休學，踏上全職運動員之路。「如果我去考DSE，全部訓練我都要停晒，我唔想因為考DSE放棄自己嘅夢想。」Lawrence很清楚自己的目標︰「呢個年代，學業唔代表一切，我對讀書冇興趣，好多謝我父母嘅支持。」他在2016年代表香港參加世界青少年劍擊錦標賽，名列男子少年組（U17）個人花劍賽第5位。運動員的收入有限，不過他說︰「體院（香港體育學院）份糧係根據你攞到幾多獎而定，雖然唔多，但食、住全包已經幫輕咗。」
4歲起便當童星的Lawrence，為自己賺了不少零用錢，這筆錢夠資助他去參加比賽，他說︰「出外比賽我哋要自費，除非排名前四名先可以用公費。」Lawrence是隊中的康樂大使，他說︰「我係個古靈精怪嘅隊友，有時搞吓笑。」問他將來會否再做藝人？他笑謂︰「好難講，呢一刻我都係希望將來做教練，通常退役係30幾歲，仲有10年。」
撰文：羅如文
攝影：仇志德