大衛施華同曼城完咗合約離隊，禮拜一選擇返番西班牙加盟皇家蘇斯達。但據意大利傳媒報道，本來施華就應承咗會加盟拉素，後者仲已經為施華提供咗一份價值400萬歐元（約3,600萬港元），為期三年嘅合約，點知最後竟然俾人「放飛機」。報道仲話，喺施華同皇蘇簽約之前，一直都冇同拉素講話會加盟另一支球隊，所以就令拉素嬲到震。拉素嘅體育總監泰亞仲喺官網度鬧爆施華嘅行為：「我好尊重呢位球員，但唔尊重佢呢個人囉。」對於拉素對施華既指摘，施華老竇接受訪問時就為囝囝辯護，話根本未同拉素達成任何協議喎。睇嚟大家都可以買定花生睇吓呢場羅生門點發展落去喇。