前星期馬主F買黃金期貨（COMEX Gold）賺到笑，黃金升破2000美元關口之後，佢又在2067美元一安士沽空，一擊即中，果然係鴻運當頭，不過睇吓長期持有嘅收息股滙控跌到34蚊水平，都係笑唔落，不過佢一向話滙控已經冇眼睇，沽之哉就損失慘重，好彩唔駛靠收息過活啫，索性唔理，炒金賺到錢，咪去食魚翅撈飯囉。去灣仔七福，唉，一點鐘，只得六個客，點半鐘又多六個客，雖然已經指定最低消費每位五百元，收足都唔夠夥計出糧，遑論交租咯，或者因為人客太少，蟹黃翅與炸子雞有啲失色，下次都係去番尖沙咀九福好啲。
後來與朋友去陸羽飲茶，成個午餐時分，又係得六個客，與過往高朋滿座之盛況差好遠。餐飲業遇上C-19，真係死到臨頭，餐廳R變得沉默寡言，佢話Michael Tien（田北辰）都畀世交Peter Wu（吳光正）封舖，零售業已死，餐飲業何嘗不然。餐廳R點解話田吳是世交呢？可能係咁，1949之後，夠聰明嘅上海幫商人知道共產黨會充公產業，紛紛南逃英國殖民地，於是香港紡織業、航運業突然興盛，有資金、有人才，航運業有董浩雲、包玉剛、趙從衍三大巨頭，紡織業有唐炳源（南海紗廠）、查濟民（中國染廠）、陳廷驊（南豐紗廠）、楊元龍（聯紡），還有田元灝（萬泰製衣）等等。田元灝1974年已是立法局議員，與上海大亨包玉剛、董浩雲等當然相熟，兩個仔北俊、北辰與包玉剛女婿吳光正自少認識，一啲都唔奇。中大新亞書院有宿舍志文樓，就係田元灝捐錢，以妻子為名嘅。斬吓眼幾十年後，遇上疫情，田北辰經營G2000在海港城畀九倉追租，更搵執達吏封舖，可見在商言商，幾十年交情難敵法律合約精神。
世事轉變得快，1949上海商家南逃避秦，從內地走資唯恐不及，到咗21世紀今天（71年後），上海大亨大多轉方向，爭相北上掘金或討個政協名份，以為可以買政治保險，但基本上還是兩手準備，部份資金存在西方大國。𠵱家碰上中美交惡，美方因港區國安法制裁11人，全部富豪商家恐怕處於夾縫中（因第三代幾乎全部英美名校畢業，多持外國護照），有苦自己知也。