阿仙奴今季換咗領隊阿迪達領軍後，竟然幫球隊攞咗個英足盃，但奧斯爾就慘慘豬喇，冇乜得點出場。但近日，奧斯爾竟然喺twitter度收多咗個「契女」。事緣係咁，一位叫做羅賓遜嘅阿仙奴球迷喺twitter上發文話自己bb就嚟出世，又話如果奧斯爾回覆自己嘅話，就會將呢位即將出世嘅bb改名做「奧斯爾」喎。事隔四日，奧斯爾親自喺twitter上回覆話：「協議達成！我唔會令你失望嘅。𠵱家輪到你喇，我要睇到你個b嘅出世紙！」最後個球迷真係擺咗囡囡張出世紙上網，真係寫住奧斯爾，果然有口齒！現年31歲嘅奧斯爾同阿仙奴嘅合約將會喺下年到期，目前球會仲未同呢位德國球星進行續約談判。