上周五歐聯慘敗嘅巴塞隆拿，高層周一開緊急會議，據報美斯（小圖）對球會管理層嘅發展方向感到絕望，話佢已經向球會表示自己想喺今夏離隊。另外又有傳巴塞已經炒咗教練施迪安，57歲嘅荷蘭國家隊教練朗奴高文成為新帥大熱人選。而上年11月俾熱刺炒魷嘅普捷天奴，盛傳亦成為巴塞隆拿同曼城嘅目標，不過有指部份巴塞球員表明反對肥普接任，呢位阿根廷教頭有可能成為曼城領隊哥迪奧拿嘅繼任人選。普捷天奴、沙維同朗奴高文都係巴塞嘅心水教練人選，據《阿斯報》話，以美斯為首嘅一眾巴塞球員反對曾經效力過死敵愛斯賓奴、兼且近年曾經同沙維有過「牙齒印」嘅肥普接手。另一方面，曼城領隊哥迪奧拿仲未同球會傾續約，哥帥早前都親自承認球會主席穆巴拉克唔太滿意球隊今季成績，雙方關係出現裂痕。據英國傳媒話，藍月已經視普捷天奴為後備人選，而肥普本人家仍然保留佢喺英國嘅住所，相信佢仍然等緊機會重返英超。