贏咗英超嘅利物浦，辛苦咗成季終於可以唞吓，正選門將艾利臣比加就帶埋一家大細，去咗意大利撒丁島度假。唔知係咪受到之前轉咗新髮型嘅隊友穆罕默德沙拿影響，呢位27歲巴西門將喺度假期間，就突然心血來潮將自己濃密嘅鬚剃得一乾二淨，外表即時變得好清爽，同之前喺球場上嘅霸氣樣貌形成強烈對比。