「水着女神」樂宜（前名洛兒）近日冇工開，留守屋企嘅佢摷返舊年嘅水着相，喺網上狂貼大派福利，其中一張佢對鏡自拍展露深長事業線，嘆為觀止。
噚日係楊思琦42歲生日，佢喺社交網貼出攬住快將半歲嘅囝囝Kody嘅相，祝賀自己，不過囝囝嘅神秘老竇仍然冇出現。而前日就係曾華倩55歲生日，佢同兒子林浩賢合照之間多咗位男士，華倩仲挨住對方，咪以為係佢新男友，原來只係化妝師。前日同樣踏入55歲嘅錢嘉樂，太太湯盈盈送咗個星球造型蛋糕畀佢，4歲細女Kassidy興奮到拎木棍扑爛個蛋糕。
四房大女何超盈產女一年後，已經復工，前晚佢喺網上貼出出席聯合國青年大會年度大會嘅相，不經意地暴露屋企客廳有日本當代藝術家奈良美智嘅畫作，據知佢2015年以1千3百多萬投得。
田蕊妮同杜汶澤養咗愛貓Momo多年，不過噚日阿田表示Momo已經離世，留言：「我想一直抱住你，不想放開你！」阿澤亦貼文話：「要慢慢習慣早起時沒有你的日子。」