武漢肺炎大爆發，香港醫院就快唔夠床位收晒所有確診病人，政府將亞洲國際博覽館改用作臨時醫療中心。正常嚟講，議員梗係關心亞博館設施係咪足夠應付、安唔安全呢類問題，但攻讀夏威夷格林威治大學、一直俾人質疑個學位有問題嘅民建聯立法會議員葛珮帆「博士」，關心嘅嘢真係與別不同。佢唔知點解好關心亞博館一幅喺牆上面嘅美國自由女神像背景板，仲叫醫管局立即拆咗呢啲美帝宣傳品，但醫管局嘅回應即時令葛博士出醜。
醫管局：係原有裝飾
事緣葛博士噚日喺facebook發帖，話收到市民投訴，不滿亞博方艙竟然掛咗美國自由神像裝飾！自由神像係美國象徵，居然喺中國領土高掛美帝勢力嘅宣傳品，呢種反中亂港嘅行為，葛博士自然要嚴肅兼大鑼大鼓跟進。佢同醫管局建議出通告解釋，並立即將裝飾拆走，不過醫管局回覆話嗰度已經係醫療中心，為避免工程人員受感染，唔會要求亞博館將啲裝飾拆落嚟，結果葛博士fb自然有愛國愛港網民力撐，批評醫管局唔理葛博士。
醫管局仲澄清，話亞博本身係用嚟開展覽同演唱會，𠵱家只係暫時變做社區治療設施，所以盡量減少改動原有裝飾，並以確保感染控制為主。最重要係醫管局話，自由神像等裝飾其實係場館原有裝置，提醒要拉闊嚟睇，亞博館正門外一向懸掛國旗同區旗。即係成單嘢根本唔關醫管局事。
有網民反問，按葛博士嘅邏輯，係咪一世都唔可以睇西醫？美國冒險樂園係咪要改名？葛博士同粉絲係咪要拆咗迪士尼同深圳世界之窗？八方就戥醫護辛苦，疫情期間嘅工作量已經夠多，仲提出呢啲投訴嘅人認真涼薄。
李八方