娛圈近日爆出武漢肺炎傳播鏈，麥德羅、其女友劉麗萍（Apple姐）及劉少君等全部確診。劉少君大前日康復出院後，前日輪到麥德羅出院，昨日二人相約到酒樓嘆茶見面慶祝康復，並拍下短片報平安，麥德羅表示：「好耐冇飲過茶喇，今日同我老友記互相問好，好似生離死別咁。」劉少君就表示：「最緊要注要衞生、注意安全，病毒周圍都會有嘅。」
口罩隨處放
《蘋果》記者問劉少君，其他茶客見到他們可會驚慌？劉少君說：「絕對冇驚我哋，香港人係支持香港人嘅，有病就醫返好，咁咪冇事囉。希望所有傳媒畀多啲正能量老人家，患咗呢個病症嘅，等佢哋有多啲勇氣接受呢個醫治。」
不過片段出街後，網民一面倒鬧爆，狠批二人自私四出播毒，未有為他人着想，網民留言：「自己中咗就唔好出街啦！冇啲公德心」、「一好返又出街，祝早日瀨多次」、「好返都有機會復發咁快走出嚟周圍走，仲要去許多老人家去嘅酒樓，離譜」、「可否開名邊間洒樓，大眾安全考慮」，更有網民要求傳媒公佈他們的行蹤，指他們到過的地方都不會去，亦有不少網民指片中的劉少君口罩隨處放，及麥德羅拉低口罩進食極不衞生。
「我哋有抗體」
對於被網民喪插，劉少君昨日回應《蘋果》說：「因為我哋冇見成兩個禮拜，啱啱今日又係第一日（麥德羅康復出院），我哋聚咗一個小時啫，已經各自返屋企喇。」對被網民鬧自私有何睇法？他說：「咁都唔係嘅，我哋只係分享個過程，知道我哋要點樣更加衞生啲。」會否減少外出？他續說：「會㗎，但唔係唔出街，係點樣康復最緊要。」麥德羅就回應：「健康茶敍，合法嘅兩人一圍，互相慰問，大家都好返喇。」對於被鬧自私，他表示：「我哋有抗體，唔會播毒，唔通全港好返嘅人都播毒？請大家評評理。」他表示會好好休息：「做自己鍾意做嘅嘢，最緊要唔好影響到人哋。」
至於比麥德羅早三日出院，轉去鯉魚門度假村的Apple姐，昨日收到醫生通知可以離開隔離營，由於Apple姐確診入院前後一直沒有症狀，她昨日拍片講述，覺得武漢肺炎無聲無色好恐怖，呼籲大家要小心。