早收三日風，確係好輕鬆，9月立法會唔使選，本來有亡黨危機嘅新民黨，主席葉劉淑儀都唔使再愁，前日喺facebook輕鬆分享「再嚐牛肉飯」，話日本吉野家因為疫情打擊，宣佈全球削減150間分店，葉劉諗起舊年幫襯過，胃口大開仲一次過嗌咗兩碗，嚟緊要抽空再幫襯咁話。近來興講「加速主義」，葉劉咁樣一吻，唔知對吉野家生意有冇影響嘞。
網民笑死亡之吻認證藍店
今次唔係葉劉第一次獻吻，舊年反修例運動葉劉去過西營盤加記茶餐廳同埋西環聯華餐廳，好多網民都「感謝」葉劉提供「死亡之吻」認證藍店。嚟緊莫講一年，香港人可能以後都冇得投票，萬年議會長做長有，唔使擔心選情，八方覺得葉劉可以轉做飲食KOL，發揮大食所長，真人表演2月食兩碗、3月食三碗，為業界打打氣。