從事傳媒工作十多年的資深記者關震海，去年創辦獨立媒體《誌》。國安法嚴懲顛覆國家政權，關指法例先「顛覆香港傳媒報道自由文化」，訊息的詮釋權被政權壟斷，「條法例唔會有紅線，係咪冇法可依？咪放咗喺警察、幾個法官同個傀儡政府度；我喺現場見過叫五大訴求已經舉（紫）旗！呢個情況比喺內地採訪更糟糕。」
香港不再是避風港
他過去不時返內地採訪，「返去做足球專題，好快有地方文宣部人員陪採訪，有冇畀壓力我？我覺得冇！但家陣，（香港）警察隨時上門話你報佔領立法會，質疑你鼓吹港獨。」形容香港不再是避風港，「以前知道題材踩界敏感，只要返到香港就冇事，但呢個保護罩已經冇咗。」
雖然他認為，短期未至於因報道新聞被國安人員上門指控宣傳港獨，但仍做好防風措施，審視手頭上題材是否有機會觸及紅線。那是否自我審查？「明顯多咗考慮，例如一個鏡頭，會諗係咪出咁長？定閃一下就算。」
他擔心年輕行家是否能承受此無形壓力，「傳媒高危，易踩入黑洞。」他預言未來形勢更黑暗，「香港記者要有心理準備流亡；好多人提我要小心，其實唔知小心乜；但今日香港，各行各業都唔可能再免於恐懼，香港要淪落，受害唔只香港人，成日話有外國勢力，外國人都係香港持份者，咪等大家一齊體驗冇自由下嘅經濟惡果囉。」