全國人大常委會全票通過港版國安法草案當日，香港浸信會聯會網頁內數篇「會長的話」文章突然消失，有人猜測教會受壓，有人認為教會自我噤聲，浸聯會會長羅慶才牧師受訪時承認，把文章下架是他個人決定，「始終喺網絡唔知點俾人解讀，或者會引起不必要麻煩，為安全計先拎走。」
浸聯會長︰講道要留意有冇外人
其實羅牧師的文章，不過提及港人自由已受限，他自言非常有信心「唔會犯法」，惟仍擔心有人扭曲文章，加上未能掌握國安法執法標準，故暫不再公開撰文，「咪當睇定啲，都感覺到教會圈內有憂慮，大家唔知個影響有幾深。」
他本身非行事高調，惟去年卻公開反對修訂《逃犯條例》，又聯署要求撤回蒙面法等，如果轉趨低調，仍能作鹽作光？他就直言，「唔出聲的確一定冇事」，但經歷佔中及反送中，年輕信徒的期望清晰，故教牧必須適應新環境，「一定要摸索，唔知可以講啲乜，做啲乜，法例咁寫但唔知佢點執行；講道時會小心，留意有冇外人，可能存心嚟搵把柄；自己教會好啲，起碼認到晒所有人。」
近期另一教內紅人，是被左報多次點名的宣道出版社社長王礽福傳道，年初創立榮光敬拜事工，但國安法下事工亦即時要「縮」，公告因應時局急速惡化將暫停，再作變陣，「君子不立危牆下，除非你預明天即時送頭，政府講只影響少數人，777講咗幾多大話？」
他坦承，香港教會前路不樂觀，「想像到最壞可能係變大陸三自教會，教牧有天會成為階下囚」，但同時認為自由是人心渴求，「我哋嘗過自由嘅人，冇可能會放棄。」
而現時香港教會如一盤散沙反而利多於弊，「當權者冇咁易集中打壓，我哋唔止要be water，仲要be air，再昇華去另一形態得唔得？要釋放多啲想像力，文革時期係中國教會最興旺，時勢會令人更需要信仰。」