7月29日星期三開始，全港食肆禁止堂食，出街同行只限二人，當然出外要全程戴口罩，在三十幾度炎熱天氣之下，口罩焗到面部發熱，都唔准拉低在鼻孔以下。
戴口罩算係小事，全香港只有極少數極少數人唔戴嘅啫，但餐廳禁止堂食，就認真大件事，老友餐廳R聞訊，幾乎暈低，任何一間餐廳都好難靠外賣收入嚟交租出糧嘅，肯定係蝕本生意，不過呢招禁食令又好快撤銷，否則限期七天又七天咁延期落去，無數咁多間餐廳已經執咗笠嘞！張宇人精心炮製之食肆七月七折，八月八折大計，即成泡影。不過冇所謂啦，政府已經延遲立法會選舉，張宇人可以繼續安坐立法會內。
根本上，限聚令限二人，如果再加全日禁止堂食，已有政治考慮，如果要投票嘅話，一個票站之工作人員已經唔止兩個人，選民點樣入去？禁止堂食就係不鼓勵市民去飲茶食飯，減少街上人流，大大降低選民投票興趣。此兩招齊發，除阻止疫情蔓延之外，就係唔想立法會選舉。7月27日宣佈禁令，7月28日就傳出延遲立法會選舉，消息銜接得咁快，你估係即時決定咩，林鄭月娥等人聽晒譚耀宗，曾鈺成，黨媒言論，一早計劃定嘅嘞。
推遲選舉，藉口係疫情，完全講唔通。南韓、新加坡、東京市、俄羅斯嘅疫情遠比香港嚴重，已經順利完成選舉及公投，波蘭亦然，做乜人地做得到，香港政府就驚到面青。現在已有證據顯示，醫院抗疫專家許樹昌、袁國勇、何栢良、梁子超等人直言「豁免人士」係大漏洞，完全正確，唔到政府死賴，人地講完，政府就話啲專家「誤解」，許樹昌教授最早睇到漏洞，政府當作睇唔見，皆因運輸及房屋局不理，要兼顧太多事情，諗唔到，其實呢個局老早要分拆成房屋局及運輸局兩個局啦，或者將運輸事務交晒畀商務及經濟局。如何防範過境船員播毒方面，邱騰華局長只睇經濟利益，對船員上岸有咩嘢後果發生，根本唔理；食衛局局長陳姑娘可能在內部唔夠勢力啩，不敢堅持為船員檢疫，於是弄成今日局面。用陰謀論睇，疫情第三波可能係一個局。唔信陰謀論嘅話，就係林鄭、張建宗、邱騰華、陳帆、陳肇始都係無能之輩，管理疫情不善，令香港人擔驚受怕。