禁堂食令殺到嚟，九龍新界無得避，一眾香港打工仔再次被逼「走上街頭」搵位食飯，八方更見到好多人喺戶外身水身汗、無瓦遮頭食飯、甚至有人喺街邊跪住食飯盒，見者心酸。呢個時候，相信好多市民想知林鄭同政府高官，中午又去咗邊到食飯呢？
八方噚日下午3點分別向三司十三局司局長以及特首辦提問，查詢佢哋午飯喺邊度食。跟從公務員、即係選舉主任嘅一貫做法，郵件都寫咗要求噚日內回覆啦，點知八方呆等大半日，直到食埋晚飯截埋稿，17位高官入面竟然無一個人覆八方，唔通去邊度食lunch都唔想畀人知？怕大批要踎係街邊食午飯嘅市民，知道司局長喺辦公室嘆住冷氣食飯？定係由司機車返官邸食？噚日就有網民嬲到改咗張圖，將嘆咖啡嘅林鄭同冒雨食飯嘅阿叔放埋一齊以示不滿。
職工盟主席吳敏兒就為打工仔抱不平，話班官連打工仔食飯嘅尊嚴都剝奪埋，仲以為咁樣就做咗嘢？吳敏兒話香港人返工返得咁辛苦為咗咩？食飯吖嘛！班官咁樣折磨人，乜人都憎死你啦！佢仲話班官唔止離地，直頭心地唔好，咩配套都唔諗就當所有工種都有得室內食飯，簡直話之你死喎。