林鄭一直唔封關，令武肺病毒自出自入造成社區大爆發，為咗補鑊，離地高官出狠招抗疫玩殘市民，除咗令大家要喺街頭淋雨食飯，仲要全港市民喺公眾地方強制戴口罩，但又唔理法例要求唔清唔楚，令市民隨時無辜變犯法，或者想守法都有難度。
食衞局逾日沒回覆
本身揸開飛機嘅公民黨譚文豪（Jeremy），噚日喺fb貼咗啲相，改用一個揸烈火戰車造型、喺電單車頭盔外面加個口罩，咁唔係貪型，亦唔係想幫政府呼籲大家戴口罩，而係喺政府新戴罩要求下，揸住架私家車、電單車喺路上行駛，一定處身公眾地方，但電單車司機要唔要戴口罩就無人講過，佢亦專登問過食衞局，結果就係無結果。
其實點解咁問絕對唔係想搞事，因為Jeremy話知道好多送外賣嘅人揸電單車，隨時返工送餐變犯法，你知啦，POPO票控係唔聽解釋，只會叫你有咩同法官講，咁不如索性事前問清楚，但結果去信食衞局隔咗超過一日，都係冇人回覆囉；之不過，DQ主任政治審查參選人就連假都唔放咁追殺。Jeremy仲話，相信政府根本唔識答呢個問題，但就正正反映成件事幾咁荒謬，大家聽到張建宗叫打工仔去郊野公園食晏，就知呢班人根本一直離地離到上太空，從來冇為一般市民諗啦。
李八方