公民黨深水埗區議員劉家衡女友兼KOL「搣時潘」，出位行徑一向受網民關注，早兩日佢聲稱受男網友留言侮辱甚至性騷擾，疑似想玩返人，於是約佢去油麻地一間酒店房實行「大報復」，仲搵埋另一網上紅人Emilia Wong同攝影師，三人一齊開live直播玩人，點知玩出禍，搞到差人到場，以涉嫌破壞公眾體統罪拉晒三人。三人獲准保釋，下月向警方報到。
涉嫌破壞公眾體統
搣時潘開live直播，好多網民cap晒片，根據網上流傳片段，搣時潘問男網友「你準備好未？你又話一齊拍攝嘅。」身形肥胖嘅男網友話「你玩你玩，你哋兩個玩。」其間胖男答應除衫，在場有人仲出動皮帶鞭打床褥、打胖男手板10幾下；又除低右腳涼鞋，要求胖男有感情地舔鞋底。玩到咁大，有網民報警，差人去到酒店房見胖男唔在場，一度叫搣時潘打電話畀佢了解事件，但最終拉咗三人。警方話三人涉嫌喺酒店房拍攝不雅影片被捕。有大狀話，原本酒店房係私人地方，但如果網上直播畀公眾睇到，有機會犯法，罪成最高可判監七年。
點解搣時潘要玩呢個網友？據連登仔版本，因為有男網友疑似透過手機通訊App，出錢邀約搣時潘去酒店作不道德行為，仲講粗口侮辱女方，所以搣時潘「應邀」反擊，不過網民大多唔撐佢哋，覺得玩過火。
李八方