在會所吃午飯，隔籬枱一位白髮蒼蒼女士，睇樣年紀唔會細得過梁愛詩，用長輩口吻教訓子孫：「移民冇啖好食呀！西人蝦得中國人好緊要，如果英美地方好住，點解有咁多人回流，依家有人話手持BNO走去英國，佢地都未知死，不過既然唔鍾意大陸，走咪走囉，以後都唔好返嚟香港！」
此乃「移民呀，好行夾唔送」嘅藍絲心態，但藍絲雖然如此宣傳，雷鼎鳴話走夠三十萬人最好，佢地嘅阿爺唔知點解就好唔高興，中國外交部大罵英國之最新BNO政策。既然話留島不留人咯，香港有人要走咪話好行夾唔送囉，點解要鬧英國大開中門？劉兆佳大聲講：「中國會唔承認透過BNO取得英國國籍嘅人係英國公民，呢批人法律上仍被視為中國國民（a Chinese national）」，即係話，此類英國公民如回港（類似大批加拿大香港人回流香港），仍然受國安法管，如被捕便沒有英國領事保護權。其實劉兆佳所言，並非新鮮事物，北京老早不承認透過居英權而獲得英國護照之香港人（如林鄭月娥一家人，林鄭話佢自己放棄了英國護照）係英國人，而是中國人。現在舊調重彈，只不過係向英國發洩不滿而已，因為如有不少香港人用BNO走咗去英國，中國覺得冇面子也，「好行夾唔送」只是不明白阿爺想法嘅藍絲，憤慨之言而已。
因疫情不散，其實呢個時候移民外國，幾唔好彩，時機不合，到外國未必搵到工作，焗住要留港揸頸就命等機會，目前要受黨官治港。香港目前已有實際（de facto）的特區黨委書記駱惠寧，睇住特區市長林鄭，公安大權由國安公署署長鄭雁雄掌握，審國安事件法官由林鄭指定，以後一切官員要為國安服務，如田飛龍緊急反駁馬道立大法官（星島日報7月3日來論）：「只有香港本地司法機關有關法官及格承擔起國安案件的司法管轄責任，才能以其司法獨立和專業性服務於香港國安法治，保障一國兩制行穩致遠。」好明白啦，馬道立大法官講司法獨立，田飛龍立即反駁，話司法「服務」於香港國安法治，司法要為國安服務，不能有其獨立性！馬道立大法官要退休了，且看其繼任人是否安心於「服務」國安。