香港法治籠罩喺港版國安法陰霾下，慶幸有一線陽光。前法律界立法會議員吳靄儀（Margaret）近日獲美國大律師公會，頒發今年度嘅國際人權獎，公會嘅國際人權獎委員會主席話，獎項係要表揚吳靄儀喺捍衞香港人權同法治嘅傑出成就。
現任法律界立法會議員郭榮鏗原來係Margaret嘅提名人，佢話非常榮幸能夠提名Margaret參選美國律師公會國際人權獎，透露過程之中除咗佢自己，仲有數位法律界前輩寫支持信推薦Margaret：「Margaret這次獲獎是實至名歸，相信Margaret不會因此而停下來，她一定會繼續在公民社會發熱發亮，與香港人同行，對抗黑暗。」堅持「法治危急要stand and fight」，Margaret 獲人權獎確係實至名歸，之但係香港政府卻喺今年4月，控告佢參與及組織未經批准集會及遊行，認真諷刺。
709案王宇律師曾獲獎
不過有法律界中人睇完以往得獎者，發現拎得嘅好多都係一殼眼淚，好似2019年得獎人係沙地阿拉伯律師Waleed Abu al-Khair，因為爭取議會民主化，所以被控以恐怖活動罪行，判15年監。
呢位法律界中人遇見Margaret，仲想考佢知唔知上屆得主係邊個，點知Margaret考返佢轉頭，知唔知再上兩屆得主係邊個？佢當然唔知，呢個時候Margaret答佢係王宇，709案中最先被拘捕嘅律師，聽到呢到令該法律界中人心酸。
李八方