武肺疫情喺4月緩和少少，香港大學微生物學系講座教授袁國勇曾提醒港人唔好咁老定，預告病毒7月前唔會完結。呢番話當時被好多藍絲質疑，親子王國一眾港媽更鬧袁教授，話佢「人一黃，就會語無倫次」、「呢D嘢天先知，你又唔係病毒條蟲」。喺鍵盤大媽面前，微生物學權威又算老幾呢？
有人反駁「140萬人感染」未實現
不過正所謂睇相佬呃你十年八年，袁教授苦口婆心嘅勸告，結果噚日就成真，香港多區爆疫，政府都立即收緊防疫措施，呢班親子王國叻唔切嘅港媽，係咪要認錯同教授道歉呢？有人噚日喺親子王國出post挑戰，問「之前係咪鬧袁國勇唯恐天下不亂？」一班港媽群起反撲，話7.1咁多人一齊出去播毒，又有人再拎袁教授話香港140萬人感染再鬧過，反問係咪實現咗？力證冇鬧錯人，仲有人話有人想迫害佢哋，令其他人唔上親子王國，方便其他人壟斷資訊喎。
係咪一人藍腦就殘？八方唔敢評論，但公道啲講，7.1群聚唔止抗爭者㗎，仲有幾千警力，八方見到好多仲唔戴罩㖭，仲未計市民防疫意識低左，又去海洋公園又去迪士尼，到處都係檢疫漏洞唔爆先出奇。八方最後溫提，有病徵就盡早求醫，盡早隔離。