上星期南華早報與信報都有報導不少中環金融界人士考慮以BNO持有人身份，移民去英國、移民離開香港，係一個好困難嘅決定，左丁山一輩在1982年之後便曾經歷過移民之苦，當年大批朋友、校友走去澳紐加，放棄在香港之大有前途職位，財政上犧牲十分大（不過二十年後先至清楚知道），唔少仲離婚收場㖭，最離奇一位係要回港做太空人，因薪高糧準也！將太太兒女留在彼邦，搬往在一位大學同學住宅嗰條街落腳，叫老同學平時照顧家人，如是者飛來飛去，兩年後，老婆話要離婚，朋友在港捱世界，眼白白睇住老婆帶住仔女去嫁人，嫁畀邊個？就係老同學囉！當然亦有另一面，就係一啲朋友做太空人做得好爽，在港冇王管，飛上上海公幹十次八次之後，就覺得上海女子美麗動人體貼溫柔，於是包起小三來，最後老婆聽到小報告，又係離婚收場。
夫婦一齊移民捱世界，不做太空人，婚姻會穩固啲，但要喺英國重新出發，搵番香港薪水，殊不容易，好容易自尊心受挫，釀成心理問題，此則要講EQ嘞，即使銀紙不是問題，都要為仔女教育操心，在英國搵書讀，殊不容易。
前幾日與「英識教育」創辦人陳思銘講起，佢話英國大名氣學校如易頓、哈羅、溫徹斯特等類別，非平常人家子弟可進入，多數讀公立文法學校（Grammar School），有名氣嘅如香港皇仁、庇理羅士之類別，非常非常難考入，當地人亦爭崩頭，故此事先要仔細計算好去英國落腳邊一個校區學校，搵到（a） 好好，（b）唔錯嘅，以免誤了自己子女。
陳思銘原來九歲就去英國讀寄宿學校，一路讀到諾定咸大學，華威大學，主修政治與經濟，得碩士學位，所以對英國大中小學都有經驗。細細個入讀寄宿學校，會否受欺凌？陳思銘話：「一定有嘅啦，同學未必會打你，學校管得好嚴，但成班同學唔同你玩，令你感到孤獨，學校都冇符，香港學生要有EQ訓練，盡量融入英國學童圈子，譬如參加學校嘅欖球、板球活動，唔好食即食麵，學食fish n chips至得。」近日傳出消息話BNO持有人可到英國，陳思銘立即收到大量升學查詢，反而一啲移民顧問媽媽聲，因為客戶立即悔約唔簽合同，話自己可以搞得掂去英國喎！