香港又再出現武漢肺炎本地個案，仲要有幾個源頭，好多市民好擔心爆發社區傳播，有醫生叫市民千萬唔好鬆懈，洗手同戴口罩一定要做，作為領導抗疫嘅特首林鄭月娥，竟然喺本地個案再爆發之際，唔戴口罩開記者會，咁算唔算冇以身作則？
曾指政府口罩麻麻哋
其實林鄭上月底出席行政會議前見記者時仲有戴政府嘅「底褲口罩」，仲話底褲口罩「麻麻哋」，埋怨可能係因為洗得多「鬆咗」，點知噚日佢現身行政會議前記者會，就唔知根據乜嘢科學邏輯，竟然喺「武肺之下，除罩見人」。八方現場所見，林鄭現身行會時，隨行嘅全部G4、新聞處官員，以至在場記者都有戴口罩，全場唯一唔戴嘅，就只有林鄭一個，今次佢又係獨排眾議唔戴口罩見記者。
其實林鄭自2月中以來，經常被網民質疑根本連正確戴罩嘅方法都唔識，但大家點都估唔到，負責領導抗疫督導委員會暨指揮中心嘅佢，呢日竟然其身不正，連口罩都唔再戴。莫非佢真係好似中共推動國安法咁，現時已經唔介意人哋點講，佢鍾意戴就戴，唔戴就唔戴？咁又點叫市民唔好放鬆抗疫呢？
李八方