每次看到巴郡新聞，都諗起WFH（Work From Home）和Accumulators（香港人叫I kill you later），三件事好像風馬牛不相及，何解諗埋一齊？
事源十幾年前，有個「飛來蜢」，mid-forties、HKU、然後哈佛MBA，不過係醒嗰隻，好慳家，踏實不多言笑，捱咗十年美資律師行通宵達旦的IPO生涯後，賺咗嚿錢想投資。
「飛來蜢」有3個仔女，嚟緊再多一個，有5球美金想投資，唔介意畀15至20年時間，目標係差唔多退休時增長到20球，仔女最後每人分到5球。傾咗好耐，全世界都問過晒，但佢問得最多嘅就係畢菲特。「你其實係咪好想投資巴郡？」我直接了當地問。佢卒之承認「係」，但唔知用咩嘢最佳方法。於是我話返去assess下佢嘅risk profile，如果ok就會畀個proposal佢，當時係2002年第四季。
說時遲那時快，香港跟住就爆非典肺炎，公司展開了第一代嘅WFH旅程。在WFH時，正正係幫「飛來猛」execute個巴郡investment plan嘅時候，一共分三個strategies，其中一個就係用accumulator。
香港投資界和監管機構對accumulator一知半解，其實accumulator只係個acquisition策略，冇話好定唔好，最適宜去吸納一隻想長揸嘅股票，但唔係盲中中咁做，而係睇位喺隻股票在range trade嘅時候用。雖然5球美金唔係大，但當時係沙士，又WFH、又巴郡，係一個好型嘅plan，於是我都樂見其成。
成個plan卒之在平均價6.8萬美元左右吸納巴郡。17年過後，巴郡股價最高去到35萬美元一股，可惜武肺襲美，嚟得太快走唔切，於是喺「飛來蜢」同意下，成個盤就在27.5萬美元平倉，任務完成，皆大歡喜。
人在市場，對咩嘢都唔可以一生一世，最緊要有discipline，目標已達就唔好再回頭。就算係熱戀了17年，也會有分手的一天。
遮打道口水佬
本欄逢周三刊出