伍姑娘中學時期曾誤交損友，被帶去茶樓見社團話事人，本來對方要收她540元入會費，她沒錢講價到3.6元都要交，事件最後鬧大，有警員到校中調查，幸好沒留案底，被警誡了事。事件都對伍姑娘的成長帶來一定影響：「那段期間有唔開心，返學怕俾人欺凌，呢啲經歷令我性格自我保護意識好強，人會冇咗信心，恐懼隨時被人打，性格有少少神經質，𠵱家大個都係咁。」
伍姑娘多年來默默工作，不過她承認初入行時，在不知情的情況下參加過收錢飯局：「啱啱選美出嚟，嗰時興去ball，我以為公司食飯，去到埋位時，啲女仔要梅花間竹咁坐，我食完走時，有個男人電梯口派利是，好似出糧咁，但又唔係job，收到一封利是，得嗰幾千蚊，又唔係人哋傳嘅百幾萬飯局，我事後有少少嬲自己攞咗㗎，但唔收都收咗，惟有下次醒目啲，唔好去囉。」她強調從未被問價：「啲人識睇樣，問價就問隔籬，你點對人，人哋點問你，物以類聚。」