提起伍詠薇，大家會記起她曾參選亞洲小姐，丈夫叫練海棠。但記性好的讀者應記得當年選美後，伍姑娘曾似21歲之齡嫁51歲的香港安永會計師事務所高級合夥人翁江培，可惜婚姻只維持了短短13日，翁江培就因心臟病發猝逝，頓時令伍姑娘由靚太變寡婦，9年後才遇到廣告人練海棠，開始第二段婚姻。伍姑娘指亡夫已種在心中，多謝對方教她做女人。
現年51歲的伍詠薇1989年參選亞姐入行，其實此舉是其亡夫翁江培的意思，伍姑娘指當年任職marketing時因緣際會替亞姐拍宣傳片，經導演介紹下認識翁江培，才開始交往︰「佢目的係想掟我入大染缸，考驗我會唔會學壞，同時測試吓我對佢嘅愛，就係咁我咪去選囉！」她稱既然對方想她參選，證明自己對他的愛，於是一口答應。當時伍姑娘算大熱，但最後三甲不入。
伍姑娘後來閃嫁翁江培，雖然兩人年齡相差30年，但亦師亦友，即使後來男方不幸猝逝，自己更被指為『劏豬凳』，伍姑娘亦無怨無悔，這些年來更一直長存她心中︰「我不時都會諗起佢，佢種咗喺我心中，係真㗎！教我好多嘢，我仲記得，佢嘅好，我全部都記得，佢係一個對我好好嘅男人，佢係我人生教科書，教我做一個女人，你聽過一個老公教你做一個女人未？」
險被初戀男友呃
翁江培逝世後，伍姑娘重新振作在娛樂圈工作，沒想到此時重遇11歲時因搭巴士而識的初戀男友黃同學：「以前亞視舊廠化妝間有個電話，咁啱有一日佢打嚟搵我，嗰時心情有啲失意，同個puppy love相遇返，佢叫我出嚟飲嘢，我係雙魚座，好易動心，中間有段撲朔迷離關係。冇耐有人向我提水講個男仔啲企圖，我聽完臉色變晒，趕咗個男仔走，正式結束呢段巴士情緣。」
之後伍姑娘經好友黎姿介紹，1999年嫁給練海棠，兩人剛度過結婚21周年，名副其實老夫老妻，伍姑娘會叫丈夫做「老練」。伍姑娘自爆黎姿曾向練海棠大力推介自己，但起初對方以「我睇報紙佢好癲」為由婉拒，後來兩人約得成，一拍即合，拍拖8個月即宣佈結婚。
練海棠每晚按腳
伍姑娘感覺21年眨眼即過，非常珍惜現在所擁有，大讚老練︰「佢照顧得我無微不至，我好難湊，我難過隻獅子，我係幾怪一個人，多重性格，一定係佢咁包容我。」即使練海棠2016年被拍到背妻「偷食」，伍姑娘亦立即選擇代老公向記者拆彈，處理得大方得體︰「老公唔係呢行，更需包容佢多啲，幫佢落台解圍。佢係我家人，我有責任去保護佢。」
伍姑娘指練海棠是她一生最愛，閨房小秘密是練海棠每晚會細心為老婆按摩雙腳，她風騷說：「佢噚晚先按完腳，有次我笑佢姓練，就叫老練不如同我『摙腳』，佢知我着高踭鞋做嘢小腿會好攰，佢錫我同我按，按摩都促進夫妻關係，我訓練得佢好好手勢。」
撰文：比華利
攝影：陳俊強
場地提供：源品雞煲