現年37歲的印度裔香港演員陳振華（Ricky），去年拍攝劇集《金宵大廈》與鄧佩儀做一對，靠深情形象成功入屋。不過，現年33歲的Ricky老婆Alison前日在社交網撰千字文，控訴Ricky八宗罪，包括為包二奶拋妻棄女、欠交學費令女兒失學、到處抹黑妻女、虐打女兒至流血、工作態度差推job、借街數不還錢、玩失蹤後取消公屋令妻女流離失所、妻女要靠餐廳接濟。Alison怒斥Ricky：「你有冇人性㗎！」並指對方失蹤而未能辦妥離婚手續。
Alison是香港人，跟Ricky結婚6年，她說是「忍無可忍」才公開老公惡行，因為Ricky玩失蹤，令兩人的離婚手續一直未辦妥：「WhatsApp唔睇、電話唔覆，正式失蹤都有年幾，對上嗰次都係搵人去內地搵佢拍嘢，我唔知佢喺邊，畀唔到離婚信佢，如果要搵內地司法部搵佢又要錢，因為佢一直冇簽紙，𠵱家搵法援幫手。」
老爺有幫手
單親媽媽Alison面對經濟壓力，但依然婉拒親友幫忙︰「佢哋成日話畀錢，但我冇攞到，因為長貧難顧，都係自己捱緊，等社會福利署幫。早排有返上水農場做part time，但呢三個禮拜冇工開，有得返可以吊住鹽水，不過帶埋個女開工佢就餵蚊，好慘，但個女要黐住我，冇人湊。」Alison直言經濟拮据︰「銀包咁多使咁多，我老爺都有畀錢幫吓手，1,000蚊，呢排有畀少少咁囉，我哋一直有聯絡，關係幾好。佢（Ricky）連佢阿爸都冇聯絡，最近老爺暈咗幾次，過兩日我同佢睇醫生問平安鐘。」
Ricky與Alison的女兒今年已經6歲，Alison在千字文中指Ricky經常打女兒頭部，說女兒賤，Alison指女兒與Ricky關係疏離︰「佢唔係咁鍾意爸爸，鍾意同佢鬥氣。」在Ricky失蹤後，囡囡也沒有找爸爸，Alison大嘆丈夫在內地包二奶後，整個人變了，更絕到取消公屋，令她們流離失所。
囡囡冇書讀
Alison拒絕透露現時行蹤，因為丈夫借下一身債，她怕被財仔騷擾。問到Ricky欠債多少？她說：「其中一個債主係幕後人員。」問有否問藝人借錢？她說：「我唔知呀，唔好問我。我谷咗好耐，曾經係兩公婆，但佢真係太過份，走唔緊要，但搞到個女冇書讀，我第一個嬲，佢仲要咁講我，真係嬲得滯，難聽啲講，送份大禮畀佢，但唔想踩多佢幾腳。」《蘋果》曾聯絡Ricky，但未有回覆。