唱到首首金曲家喻戶曉固然好，但起碼都叫有一曲經典，好過冇！彭家麗，有兩首。
《從不喜歡孤單一個》是多少人的K歌合唱飲歌？還有一首列入廣東歌最長歌名名冊內的《是不是這樣的夜晚你才會這樣的想起我》，她不止一曲走天涯，有了這兩首歌，已夠彭家麗一生登台必備。
2020年了，有誰還在聽？歌者卻復出樂壇，這星期將開記招公告，今天彭家麗在影樓說：「呢一刻我都要加油，畀心機做一個努力嘅新人！」
舊人新做，又可以華麗轉身。在影樓拍照時，化妝師說：「拍得好靚，好似拍MV咁靚！」記者問彭家麗：「有冇諗返起《再見十九歲》？」主角隨即微微大側臉重現1989年的《再見十九歲》甫士，那是彭家麗的第一張迷你唱片封面照。她說：「嗰陣我仲返緊學呀！」
彭家麗依然是那麼鄰家，只是多了幾分熟氣。訪問後一天正是她生日，51歲彭家麗說：「𠵱家去到一個年紀，做嘢最緊要開心！」且聽這位「新人」說舊話。
撰文：文嘉龍
攝影：郭賢興
新歌手覺得自己係星
復出，今次其實是第二次了。彭家麗上一次回歸，大家都印象深刻，2013年在籌款活動上與娛樂公司主席朱壽仁合唱《從不喜歡孤單一個》。多得「朱主席」的「超凡」歌藝，令原本已消失娛樂圈的彭家麗，再度受注目。
「突然之間有一晚好多記者搵我，當時都唔知發生緊乜嘢事，突然又有幾間唱片公司同我傾，感覺完全冇準備！」最終與入行的第一間唱片公司Sony再續前緣。
樣子生得再鄰家都好，畢竟不再少女，再戰樂壇，今時不同往日，說話客氣又感謝主掛嘴邊的彭家麗，也有吃不消的時候。「我真係有啲好個人嘅感受，呢個年代一啲新歌手，佢哋真係會有一種，覺得自己係一個『星』，呢個係我嘅感受，冇話佢哋啱定唔啱，真係冇咁謙卑呀！有啲可能唔會打招呼、有啲可能有人介紹咗呢個係前輩，但係態度都係……唔係十分尊敬！我又冇唔開心，可能以前我哋嗰個年代，大家好珍惜每一個工作機會，或者有啲好紅嘅artist都唔會覺得『我係好紅』囉！」
彭家麗都紅過。當年與蘇永康合唱的《從不喜歡孤單一個》是K歌經典，但她卻選擇在1995年與唱片公司解約，原因是自覺不適合在娛樂圈生存，「我冇後悔囉！當時做得唔開心，試過on stage唱完歌，笑晒唱完一返到後台，唔知點解啲眼淚就流落嚟，𠵱家講緊可能係depression（抑鬱症），以前年代唔興呢啲字眼。去到咁嘅地步，我覺得要離開下嗰個環境！」
離開樂壇後，專心做歌唱老師，彭家麗發覺比起當歌星開心得多，「做歌唱老師滿足感大好多，可能我前段時間壓力大，所以享受唔到個過程，但當我去教人嘅時候，由佢唱得唔係幾好，到唱得好好，你就會覺得滿足感好大！我付出嘅努力，同我得嘅收穫成正比，同之前喺娛樂圈唔同囉，娛樂圈要靠好多譬如公司要同你去傾啲乜嘢返嚟，要靠好多唔係你自己控制範圍內嘅嘢！」
成個人生都轉晒
付出同收穫成正比，你努力自然會贏。彭家麗入行前參加唱片公司主辦的《亞洲之星歌唱比賽》贏得冠軍，「我係陪朋友參加比賽，第一次參加比賽就係陪我家姐，我識咗一班好鍾意參加比賽嘅朋友，跟住每一個比賽佢哋都會叫晒所有人去參加。我第一次係參加《少年警訊》歌唱比賽，同我家姐；唱片公司個比賽就係呢一班朋友，佢哋直頭攞我啲資料去報名。」
時為1987年，那時候同場比賽的，還有剛從北京來港不久的王菲。彭家麗贏王菲喎！夠巴閉啦！「我試音係唱憶蓮嘅《放縱》，比賽就唱麥潔文嘅《斷》同唱咗一首五輪真弓嘅日文歌《戀人よ》（戀人啊），即係譚詠麟嘅《忘不了你》！當時係日本公司，有一啲日本人過嚟香港做評判，所以我哋必須要唱一首日文歌，再加一首自己語言！王菲我係好深刻，佢完全未出道，同埋嗰時都係叫王菲（仍未改藝名王靖雯），佢把聲好好聽，佢唱鄧麗君嘅歌！我贏咗冠軍去完東京比賽，返嚟簽咗公司，我同簽我嘅朋友講，我話我記得比賽嘅時候，有個唱歌好好聽嘅女仔，你哋會唔會簽埋佢呀，當時佢哋就話，佢啲廣東話好似唔係幾正喎，跟住我心諗，你哋真係走寶呀！我就係一個咁嘅性格嘅人，我唔會妒忌，我真係好想大家都好，希望可以識到真心嘅朋友，可以一齊行！」
可惜同行如敵國，彭家麗說，在娛樂圈難有知心友。在樂壇的經歷，彭家麗沒有甚麼驚濤駭浪，不及她在2004年在街頭遇上「扑頭黨」打劫大打擊。「算係人生大事，因為真係成個人生都轉晒囉！由我俾人扑頭打劫開始，其實我留院唔係留咗好耐，因為我頭骨裂開咗，冇嘢可以做，只係等佢慢慢生返埋，好彩我冇瘀血，唔使開咗個腦，但係頭骨裂嘅情況唔係少少裂痕，而係裂開咗！」
鄰家女子人生最徬徨的一刻，「我唔可以郁動太多，醫生話個個人唔同，半年至兩年不等，先至可以等佢慢慢生返埋！嗰段期間會諗好多嘢，因為你唔會知道自己會唔會好返，嗰時又教緊唱歌，仲係一路好多登台嘅時候，啱啱去完加拿大登台返嚟，所有工作突然間停晒，收入突然間停晒，瞓喺度休養嘅時候都仲有人打嚟叫我去登台，我話我唔知以後唱唔唱得呀！但我係一個比較冷靜嘅人，我不停同自己講，放鬆啲放鬆啲，會好嘅！」
人生大變，彭家麗被扑頭後就信了主。「我會諗究竟生命個主宰係邊個，跟住就返咗教會，我覺得嗰一刻先至學做人，覺得好多嘢都係自己以前諗埋一邊，自己控制得唔好，思考返自己以前做過嘅嘢！」
原來生命咁兒戲
沒有經過大風大浪，不會成長，彭家麗說：「你諗返轉頭，如果唔係以前嘅所有片段加埋晒，又點會有今日嘅自己。人生就係一個計劃，一定會行到今日，但係十年後會點，𠵱家同十年後，中間嗰十年又會發生乜事呢，我好相信中間呢十年發生嘅事情，係為咗磨練十年後嘅我囉！」
芳心寂寞，小女子總得有個歸宿，已記不起單身多少年的彭家麗說，現在已不急於尋找愛情。2007年，她與圈外男友決定結婚前，忽然打消計劃，這段情之後，彭家麗偏偏孤單一個至今。說起悔婚情緣，原來是一段異地戀，「最大原因覺得未係時候進入婚姻，到籌備婚禮嘅時候，我飛過去嗰邊近距離接觸，發覺唔係咁一樣，唔係話佢有嘢呃我，而係我覺得每個人都係，有啲嘢係自己唔知道嘅！」大家再見亦是朋友？「其實冇乜聯絡，但唔會話冇朋友做嘅！其實我哋都一齊見過輔導，係見完輔導分析過之後，大家決定囉！」
愛情不及親情偉大。彭家麗的媽媽由發現患上肺癌到離世只是數個月時間，2016年的母親節當日，她連媽媽的最後一面也見不到。「人生本來就有好多無奈！我媽咪走嘅時候，我係全家唯一一個見唔到佢最後一面。我一路都喺醫院陪住佢，陪咗一、兩日我好攰，我想返屋企沖個涼，返到去攰到喺梳化瞓着咗。佢哋去晒醫院冇打一個電話畀我，因為半夜，佢哋淨係WhatsApp咗我，平時我好醒瞓，但嗰刻可能喺醫院攰得太耐，咁啱就喺嗰個時間走咗！」
留下爸爸一人，彭家麗更加珍惜和父親相處日子，「佢照顧得自己好好，當然我自己都盡量抽多啲時間陪佢，因為我媽咪走咗，我先發覺我未同過佢哋去旅行，一次都未去過！媽咪走咗之後，爭取多啲機會同我爸爸去囉！近距離接觸死亡呢件事，仲要母親節當日，我發覺原來生命可以咁兒戲，好似個燈掣一啪就熄咗，當然我自己俾人扑頭打劫嘅時候，我都學識珍惜生命，但係未試過身邊咁親嘅人突然之間冇咗！」
最難忘陪伴媽媽的最後一段日子，「確診咗癌症，我多咗喺醫院陪佢傾偈，因為等覆診都係好長時間，有好多服侍佢照顧佢同佢傾偈嘅時間，都係以前冇嘅，嗰段時間先至發覺了解佢，原來佢咁樣諗嘢㗎，原來佢咁搞笑㗎，講真做仔女嘅時候，你有冇諗過你阿媽究竟係一個乜嘢人、你阿爸究竟係一個乜嘢人，佢哋究竟係乜嘢性格，你唔知㗎原來，真係過後先至發覺要多啲時間關心下你身邊嘅人！」
彭家麗說：「聽日會發生乜事，你都未知啦！」活多一天，賺咗！
【後記】朱主席
唱過《從不喜歡孤單一個》的彭家麗，現實真的有如歌詞，可惜偏偏孤單一個，有否想起的，不是蘇永康，卻是朱主席。
曾經出過聲明與朱主席劃清界線，「因為佢同我講係一個食飯嘅飯宴，我去到淨係見到點解唔係一枱枱，當時大家未合作過，我會收咗一啲車馬費，但係我知可能有啲歌手最後係收唔到錢！」事隔多年，說起這位「重要人物」，彭家麗說：「冇聯絡，但係有一次我去教會分享，佢坐咗喺席上聽我分享，之後應該見過佢一次，係條片段出咗街之後幾個月啦！」主席下落如何，無從稽考，「真係唔知，但係有時網上面佢有啲新聞，我啲朋友會掟畀我睇！」
沒有朱主席，彭家麗不會再現幕前，「少少諷刺啦，但都有少少開心因為呢件事可以唱返！」是福是禍，一言難盡。
化妝：Jessica Chan
髮型：Alex Chan of salon Nova