上個月啱啱易主、由香港財團管理嘅英冠球會韋根，喺上禮拜三宣佈進入破產保護，同時球隊喺聯賽會被扣12分，直接跌落降班區，下季好大機會轉戰英甲，認真慘情。不過喺韋根宣佈破產後，負責管理英冠、英甲同英乙嘅英格蘭足球聯賽賽會（EFL）主席柏利突然爆料，話有前韋根管理層涉嫌喺菲律賓投注，賭球會今季會降班。
有傳喺菲律賓落注
其實近年韋根一直同香港有關，因為喺2018年11月嘅時候，前班主韋蘭家族就以2,200萬鎊（約2.26億港元），賣咗球會畀香港嘅國際娛樂，直至今年六月，國際娛樂又將股權賣咗畀同樣係港資嘅Next Leader Fund，仲搵埋前港腳司徒文俊做董事局成員。不過，球隊易主咗唔夠一個月，韋根就喺上禮拜三成為咗武漢肺炎影響下，首間需要申請破產保護嘅英格蘭職業球會。
喺韋根宣佈破產後，網上就傳出一條短片，內容係EFL賽會主席喺街度，同另一位韋根球迷討論有關球會破產嘅情況，柏利喺影片仲大爆：「有各式各樣嘅傳聞，有傳聞話有人喺菲律賓投注，賭韋根今季會降班，因為有前韋根管理層喺菲律賓涉及相關賭博業務。」
破產冇糧出扣硬12分
至於柏利喺街頭同球迷傾偈呢段片流出後，EFL發言人都承認片中人係柏利，但後者並唔知道自己被偷拍：「我係同一位唔識嘅韋根球迷討論呢件事，至於主要內容係賽會點幫韋根。」而之前EFL已經發聲明指，如果今季韋根最終排名唔喺降班區，球隊就要扣12分；如果最後要降班，呢12分就會下季再扣。
另外，據英國《每日郵報》報道，韋根已經同一眾球員表明今個月唔會出糧，就算球會有足夠資金，球員最多都只可以出20%人工。球員對冇得出糧呢件事相當不滿，士氣大受打擊，暫時唔知球員會唔會採取其他行動。至於韋根就搵緊白武士打救，但前班主韋蘭家族受訪時就話，自己對球會財務問題同債務一無所知，冇可能承諾去救球會，目前只會靜觀其變。