啱啱同阿仙奴續約一年嘅大衛雷斯（左），喺周日英足盃正選上陣，可惜踢到54分鐘就因為足踝受傷而退下火線。雷斯近排嘅表現未如理想，而球員時代都係踢中堅嘅曼聯名宿里奧費迪南（右）就希望佢復出後可以減少比賽中嘅犯錯。里奧話：「如果我係雷斯，我會好好咁由自己嘅經驗入面借鑒學習，33歲嘅佢有唔少大賽經驗。」的確雷斯生涯曾贏過唔少冠軍，包括英超、歐聯、歐霸同埋法甲聯賽冠軍等。但諷刺嘅係雷斯同時亦係後防「自爆」嘅代名詞。里奧又話：「我哋都曾經試過踢到冇哂信心，喺咁嘅心情下踢得差，梗係會成為大眾嘅焦點。希望佢下場比賽可以踢得簡單啲，唔好再做埋啲奇怪同黐線嘅行為，展示出90分鐘高水平嘅表現。」