周日德乙煞科，史特加雖喺主場1:3不敵達斯泰特，但照樣憑住聯賽亞軍身份自動升班，降班一季後重返德甲。今場幫史特加入波嘅前德國國腳馬里奧高美斯亦功成身退，賽後宣佈掛靴。
海登咸不來梅踢附加賽
其實史特加賽前都基本上升硬班，領先海登咸三分兼有得失球優勢，雖然史特加最終輸波，但海登咸作客比勒費爾德亦慘吞三蛋，令史特加自動升班。海登咸慘敗仍然有機會升班，佢哋會同德甲第16位嘅雲達不來梅喺周四踢附加賽；至於漢堡就錯失機會，最後1輪主場1:5慘負辛特侯遜，聯賽重開後9場得2勝，由爭標分子變到升班機會都冇埋。
史特加升返上德甲，對高美斯算係一個完美結局。即將喺下個月滿35歲嘅高美斯出身自史特加，仲係球隊2007年贏德甲嘅主力。之後佢同大部份德甲球員一樣，成名後加盟拜仁慕尼黑，仲贏得2次德甲、2次德盃同13年歐聯，不過當時並唔係必然正選。14年夏天，羅拔利雲度夫斯基嘅加盟促使佢離開，之後先後效力意甲費倫天拿、土超比錫達斯同德甲禾夫斯堡。到18年1月高美斯重返母會史特加，慘成「黑腳」同球會一齊降班收場。
喺今季德乙上陣23場入7球嘅高美斯，今場賽後對於可以「贖罪」覺得好開心：「喺史特加嘅時光非常有意思，上年我哋踢得好差，好開心可以完成我嘅最後任務，呢個亦係我嘅夢想。」值得一提，高美斯喺國際賽運氣亦麻麻，由08年歐國盃起至18年世界盃，佢次次都有入選， 除咗14年世盃因傷缺陣 ，但嗰次偏偏就係德國封王嘅一屆。