還記得《100毛》毛記主播「黃慘盈」？她真名是李嘉文（Jessica），在大學時已愛上戲劇，2017年往美國修讀短期課程時，忽然認同人生要「玩大啲」，毅然放棄香港一切，移居美國紐約由零開始追尋演員夢。但過程中Jessica面對花光積蓄、試鏡失敗、更試過街邊擺檔賣書法，壓力爆煲下一度脫髮，幸獲男友默默支持，現正努力在演員路上一步一步邁進。
撰文：寶妮
現年27歲、藝名黃慘盈的李嘉文，讀書時對從事新聞擁有一股熱誠，因此考入浸會大學後便順理成章選讀新聞系，但卻因在大學進入劇社，慢慢培養出演戲興趣。為何不報讀演藝學院或無綫藝訓班？Jessica謂：「臨大學畢業時已經冇睇TVB，咁啱香港電視有招募，我就去咗試鏡，OK咗仲諗住簽約，但最後因為佢哋不獲發牌而不了了之，我嗰時好唔開心。」結果把心一橫投考空姐，不過一早已計劃只做一年，當是一個悠長假期，接着Jessica加入了《100毛》做主播，「黃慘盈」亦正式跟大家見面。
積蓄只夠交租 日吃一餐半
在《100毛》的3年間，Jessica直認發展不錯，但漸漸卻發覺自己停滯不前：「我個人係犯賤，太舒服反而想搵挑戰，因而想去外國嘅study trip。」結果她在2017年的暑假往美國修讀戲劇課程，原先只讀一、兩個月，但不久老師已問她會否留下發展：「外人覺得我係毅然離開香港，但我就覺係突然多過毅然，因我本身係鍾意planning，但做咗呢行先知好多嘢冇得plan，同老師及同學傾完，明白人生只有一次，不如玩大啲，用力做想做嘅嘢，我同自己講如果搵到地方住就留低。」結果Jessica在短時間內已找到居所，繼而辦理簽證等手續，當時她不單要香港、美國兩邊走，一年內更花光積蓄：「我嗰時只夠錢交租，再冇其他錢，試過一日只食一餐半，𠵱家諗番都好難以置信，不過我唔認為係慘，反而係神奇，係一次大冒險。」
Jessica前年更申請移民美國，結果在前年尾順利獲得「綠卡」，去年8月正式在紐約定居，因此移民並非因去年至今香港的社會狀況，但她表示：「我個心依然喺香港，因為叫呢度做家叫咗廿幾年，嚟咗美國後真係好掛住，都關反送中嘅事，同呢一年想家嘅感覺好濃厚，始終父母同朋友都喺香港，擔心佢哋安全。」Jessica不諱言亦想父母移居美國，但爸爸卻不願意：「等我4年後攞到公民資格再睇吓點，𠵱家每晚都同媽咪傾電話。」
心繫港新聞 壓力爆煲甩髮
現時Jessica一邊任健身教練為生；一邊四出試鏡，還開設YouTube Channel《all that Jessess》：「我喺呢邊考咗健身教練牌，除咗教人健身仲教人攀石，收入唔錯。」Jessica分享在紐約尋找試鏡機會的途徑，但試鏡時一定要有「入場券」，要拍大頭相（headshot），這張相片是給人的第一個印象，因此相當重要，最平都要300美元（約2,340港元）一張，貴至3,000美元（約23,400港元）亦有。若被揀中便有試鏡機會，除親身試鏡外，亦可自我拍片，Jessica坦言可能一個沒對白的角色都有百幾人去爭演，身為一個香港人，在美國爭取機會是否很困難？她謂：「乜嘢人種都係難，其實近呢十年啲戲都多咗唔同人種嘅角色，有時反而係口音問題限制咗，所以我一嚟到就搵言語教練學standard American，即平時電視劇上講嗰啲。」
Jessica坦言曾灰心過：「嗰時用晒啲錢，幾乎係零，試鏡又失敗，可能100次先有一次成功，加上當時塊面成日貼住手提電話睇香港嘅新聞，覺得自己身處咁遠乜都做唔到，精神壓力好大，結果搞到狂甩頭髮。」幸好不久已搵到工作，加上在街邊擺檔賣書法，生活總算穩定下來。Jessica寫得一手好書法，原來曾跟港產片御用書法家華戈學習：「我以前成日諗好多嘢，又鑽牛角尖，但一寫字個心好平靜，可以清空頭腦。」當然最重要是有男朋友一直的陪伴及支持：「男朋友係美國土生土長嘅華人，佢對我好好，好支持我追夢，真係好多謝佢。」紐約曾是武肺重災區，一度要封城，在6月初始解封，Jessica希望一切盡快回復正常，好讓她努力尋找機會。