政府歷盡千辛萬苦，終於搵到外國勢力PR公司幫香港重新出發！政府上年8月圍內招標搵多國PR公司幫手洗白，結果得個桔；今年政府抱住永不言敗嘅精神再公開招標，降低投標門檻，不過之前傳出有份入標嘅美國公司Edelman同法國公司MSL相繼打退堂鼓，更有報道話呢啲公司入面有員工表明唔想接呢個job，可見港府呢個客有幾受歡迎喇！不過港府終於搵到做開中東公關嘅倫敦公司Consulum（圖）接手，呢間公司最知名嘅客戶，就係人權紀錄劣迹斑斑嘅沙地阿拉伯王儲穆罕默德（Mohammed bin Salman）。
多間著名PR公司婉拒
根據PRovoke報道，今次中標嘅Consulum由前知名英國PR公司Bell Pottinger資深員工喺2014年創立，專攻中東公關市場，客戶除咗沙特阿拉伯王儲，仲有巴林獨裁政府。八方發現Consulum嘅骨幹成員個個都係英國人，其中高級總監更加係有高級英國外交官背景嘅Jolyon Welsh，估唔到特區政府都要靠外國勢力。
其實各個外國公關龍頭都怕咗香港，出名嘅公關公司好似APCO、BCW、Ogilvy、OPRG同Ruder Finn都早就表示「不了」，最後港府呢份628萬美元（約為4,873萬港元）嘅洗白工程合約，仍然落喺英國人手上，八方唔明，政府點解唔搵大灣區嘅優秀公關人才為港府做洗白工程，要明益外國勢力呢？