不少香港人非常捱得，凡事願意行多步，寧可辛苦一點也要把事情做好。然而這種拼搏精神，有時可能會弄巧反拙，在情緒病患者中，有不少因為沒有留意自己的承受能力，不懂得及時煞掣，最後弄得支撐不住。
K是公司主管，一年前開始感到有手震問題。雖然手震只有他自己感覺到，其他人看不見，也沒有影響他揸筆、揸筷子，卻帶來一定困擾，見過三位腦科醫生，做過各種檢查，都沒有問題，醫生們一致認為手震跟精神壓力有關。K見了精神科醫生，雖然沒有嚴重情緒病，醫生卻覺得K實在太過勤力，不懂得留意自己身體的訊號，有點像開車水滾，亮了紅燈，仍繼續衝下去，但K當初還是半信半疑。
於是覆診時醫生又換一個例子：「如果我哋打仗時有將軍同士兵，將軍會指揮士兵衝鋒陷陣，將軍叻嘅話，識得畀士兵有足夠嘅休息，耐不耐又搞吓節目，等士兵輕鬆一下，咁嗰隊士兵自然行軍陷陣都會表現好啲。倒過嚟，如果將軍只會逼士兵不停前進，唔理士兵夠唔夠休息，食得好唔好，到最後，隊兵就會頂唔順，越行越慢，甚至會反抗，係未？」
K因為是部門主管，所以非常明白這個道理，醫生又繼續說：「如果將呢個譬喻放喺我哋身體上面，將軍就等如我哋嘅意志，士兵就等於我哋嘅身體，如果我哋識得好好照顧身體，畀身體有足夠嘅休息，留意身體頂唔順嘅訊號，有需要嘅時候停低唞唞，咁身體就好似隊士兵一樣，表現會好啲，襟捱啲。倒返轉頭，如果我哋意志太強，不停咁逼自己身體做嘢，完全唔理會疲倦或者頂唔順嘅訊號，到最後，身體就會好似士兵一樣作反。其實，𠵱家你嘅手震，就係等同士兵頂唔順作反一樣……」
聽到這裏，K終於明白，原來自己是個太勤力的將軍，而身體就像一隊「頂唔順」的士兵，明白了這個道理，K才願意改變，多點留意身體的反應，每次出現不舒服時便暫時「唞一唞」，甚至減輕工作量，雖然手震感覺沒有立刻消失，但一個月比一個月好，希望到最後，K好好學會跟自己身體溝通，讓「士兵的狀態」回復正常。
http://fb.me/1486drlee
李德誠 精神科專科醫生
想輕輕鬆鬆健康啲，記住留意健康蘋台
http://health.appledaily.com.hk/