近排嘅阿仙奴都可以話係英超嘅另類焦點，事關復賽後兩場全敗之外，後防嘅表現亦慘不忍睹，對曼城一戰老將大衛雷斯醜態百出。不過，更令人估唔到係阿仙奴居然繼續同呢位「炸彈人」續約，除咗令唔少廠迷嬲嬲外，連批評舊東家唔留口嘅比堤都要出聲，鬧爆呢次續約完全係笑話。
「仲衰過雲格最後幾季」
比堤呢位阿仙奴舊將過去不時會公開講舊東家，就喺兵工廠宣佈同雷斯續約後，比堤接受訪問嗰陣就表示，對於球會決定同雷斯續約一啲都唔驚訝，「老實講，近呢幾年雷斯跌watt跌得好勁，根本唔可以叫做一個合格嘅後衞，但阿仙奴仲同佢續約，呢個就係球隊令人失望嘅方針。」除咗雷斯，新援薛迪索拉斯同柏保維拿同樣飽受批評，同雷斯一樣係後防線嘅「計時炸彈」，但都同樣有得留低。
之後比堤繼續唔留情面咁怒批雷斯同阿仙奴管理層，「如果我係雷斯我真係瞓着都笑出聲，每日起身都要多謝阿仙奴肯開新約。坦白講，呢次續約真係笑話，市場上冇更好嘅守衞咩？究竟阿仙奴嘅管理層知唔知自己做緊乜？」比堤更指阿仙奴喺營運上好差，全無遠見，比起雲格帶隊嘅最後幾季仲衰。
勸奧巴美揚早走早着
除咗雷斯，其他球員都不幸中槍，呢位前法國中場就直指家吓兵工廠入面，有七成球員都唔配着起阿仙奴波衫，「睇完上周六對白禮頓場波，隊波就好似一隊普通中游隊咁冇精神，我覺得對擁護隊波嘅人嚟講真係好慘。完場後佢哋仲要同馬奧比嘈交，真係搞笑，你哋應該做嘅係收聲、踢好啲波，可惜家吓隊波入面根本冇人有本事嗌得住班人。」
至於盛傳季尾會離隊嘅奧巴美揚，比堤就話如果佢係奧巴就一定會即刻閃人，因為呢隊波已經變晒。比堤呢次鬧得咁甘，希望阿仙奴全隊可以生性啲啦，周末英足盃鬥錫菲聯可以打番場好波，爭番個冠軍答謝球迷喇！