同性戀喺職業足球界向來係禁忌，自從1990年前英格蘭球星積斯汀法辛奴公開自己係同性戀後，近年較著名嘅只有前德國國腳希斯佩加喺2014年發表過出櫃宣言。近月一位英格蘭籍嘅前職業足球員湯馬士比亞堤受訪時自爆係同性戀者，係繼積斯汀法辛奴後，事隔30年再有英籍足球員宣告出櫃。積斯汀法辛奴喺宣佈出櫃後八年不堪壓力自殺身亡，佢嘅慘痛經歷令唔少同性戀足球員，喺職業生涯期間都唔敢表露自己嘅性取向，今次主角湯馬士比亞堤亦要到退役後五年先宣告出櫃，呢位侯城青訓產品話：「我從來冇諗過仲踢緊波時出櫃，我必須要喺兩者之間作出犧牲，我嘅性取向或我喜愛嘅足球，呢個社會話畀我知做運動員同我嘅性取向係有巨大嘅矛盾。」職業生涯到過美國、加拿大、新加坡等地效力嘅湯馬士比亞堤，2015年因傷退役後，直至三個月前先敢出櫃。