左報《大公》同《文匯》噚日自爆「大發現」，話揭發有所謂亂港分子紛紛四出打探逃走門路，仲爆埋幾個偷渡上船熱點，原來所謂嘅逃走「路線」，係偷渡去公海再用駁艇去台灣，雖然左報開頭冇點名係邊個，但就有幅配圖，寫住「嫌疑人遂個捉」，其中之一係壹傳媒創辦人黎智英，另外仲有黃之鋒、陳浩天同李卓人，同時內文特意再加插一段「漢奸黎多次申准離港」。不過黎智英講明一定唔會走，仲話「想創佢個心」！
八方就呢單野問肥佬黎有乜回應，點知佢就劈頭一句鬧返轉頭話對家「想創佢個心」，仲豪氣講「我走咗以後仲使做人？佢都黐嘅」，然後先理性咁分析，自己如果咁一走了次，唔只名譽冇晒，連《蘋果日報》嘅誠信同信譽都冇埋，甚至會拖累埋泛民主派，「佢（中共）就當然想我走啦，作得過就作！」最後仲好認真咁警告，話已經問過法律意見，「可以告佢，我會告佢。」
黃之鋒拒未戰先降
其實唔止肥佬黎唔會走，黃之鋒日前發表參選宣言，都講明身處政治風眼之中，未戰先降「絕不是我的選項」，仲話明係呢個危急存亡之際，必須同大家作戰到底，冇退縮嘅理由。
八方睇返篇個報道，原來有訪問咗直接參與呢類犯法偷渡活動嘅船家，同時鉅細無遺咁將成個犯法過程披露，唔知咁算唔算係干犯緊煽惑罪行呢？既然個記者已經知道晒點樣犯法，正所謂「犯法就係犯法」，POPO睇到報道後，係咪要快啲邀請有關記者協助調查呢？
李八方