無綫前新聞主播陳嘉倩離巢後轉戰做KOL，憑其靚樣及招牌甜笑，受歡迎程度依然，fb專頁吸引近10萬人讚好，Ig更有逾18萬人追蹤。即使在武漢肺炎期間，仍然有不少廣告及工作，人氣強勁。而陳嘉倩不時獲電視台、電台及網台邀請接受訪問，又或得到品牌或平台邀洽談合作。不過，有網民日前在fb以揞名爆方式，鬧爆有人「臭寸」及「例牌遲到」，更直指：「你連最簡單的禮貌都未識」。雖然貼文未有開名，但轉發陳嘉倩的報道連結，並加上打格的照片，「有人」是誰不言而喻。
「貪慕虛榮垃圾」
該貼文內容稱是代朋友發文：「最近公司同一位cctvb嘅新聞主播傾合作，以前都聽過好多記者朋友話佢好臭寸，我都唔信，話晒都係宅男女神呀，點會唔識得待人接物。點知……十問九唔應。平時約傾嘢，最X少遲1個鐘，我忍！因為我係small potato，原來記者訪問，佢都要人等個幾鐘！劉德華都唔會咁喇！以為自己係乜？姐仔？Ig有18萬粉絲好威？對不起！你連做人最簡單嘅禮貌都未識！請收皮！以後希望更多人認識你嘅死人性格！拜拜！」
女神級的陳嘉倩獲不少網民留言力撐，有網民叫發帖者提供證據，又有人指是「看圖作文」，不過也有網民留言：「合作過幾次，黑面遲到冇禮貌女神」、「根本就是一名扮上菜的，貪慕虛榮的垃圾。」
對於被指沒有禮貌兼遲到，陳嘉倩昨日以短訊回覆《蘋果》說：「都好莫名其妙，因為工作上的聯絡，我一直都係交給助手做㗎，好少人會直接搵我傾嘅，傾工作嘅事我就要同助手了解下先。我都冇約過傾嘢或記者遲一個鐘，我諗同我合作過會知我係一個點嘅人啦。」短訊中，陳嘉倩更加入滴汗emoji以示無奈。
避談拜金收兵
除了待人接物的問題，有網民又留言爆料，指陳嘉倩有醫生男友，卻與50歲的總理去北歐旅行，以及獲男士送手錶又送貓。對於拜金收兵指控，陳嘉倩只簡單表示：「唔係事實嘅嘢唔回應啦，感謝。」其實陳嘉倩早於2017年被爆做第三者，狠飛醫生男友並介入陳志遠與藝員女友朱婉禎的三年情，陳志遠更指陳嘉倩早知自己有女友，不過陳嘉倩就否認知情並極速分手，但女神形象也因此蒙上污點。