經常戴上俗稱「阿婆底褲」銅心抗疫口罩嘅特首林鄭月娥早前經常離罩，一睇就知好鬆，連佢自己都話個罩麻麻哋，更有化驗結果指出，「阿婆底褲」只要洗過一次，過濾效果就下跌兩成，專家話用一次就算，「阿婆底褲」問題多多，唔知係咪因為咁，結果林鄭又要再派即棄口罩，但又只得十個，究竟又夠市民用幾耐？
下周由香港郵政派發
林鄭噚日撰文話，政府由下星期開始，透過香港郵政免費派送即棄口罩至全港每個住宅地址，每戶一包，內附十個即棄口罩，佢話呢批口罩係政府喺本地口罩生產資助計劃下首批採購嘅口罩。今次明顯係間接跪低，如果「阿婆底褲」咁勁，又點使派即棄口罩畀市民呢？
不過林鄭當然繼續死撐話「阿婆底褲」好威水啦，話銅芯口罩一個月嘅登記期內合共收到超過144萬宗登記，涵蓋逾393萬人，政府亦已直接派發銅芯口罩到學校、住宿院舍同社福機構。
講口罩之餘，林鄭又乘機抽水硬銷港版國安法，話香港經不起「亂」，老吹「暴力破壞、鼓吹『港獨』、私藏爆炸物品及槍械等活動和行為，已明顯危害國家安全」。佢話，今次中央為香港立法係要堵塞法律制度同執行機制漏洞。查實香港法例漏洞多的是，如果係咁，中央真係一年365日都可以替香港立法。
李八方