賽前排喺英超聯賽榜第三嘅李斯特城，周二憑門將卡斯柏舒米高喺上半場勇救12碼，主場0:0賽和護級分子白禮頓。
白禮頓領隊格拉咸波特今場派出喺英超隊史最年輕嘅陣容應戰，呢支平均年齡只係25歲182日嘅陣容，喺比賽中形勢雖唔及對手，但限制李城全場只有兩次中目標射門。上半場14分鐘白禮頓仲有黃金機會入波先，係因為李城嘅占士祖斯甸喺禁區內侵犯艾朗干洛尼，白禮頓獲得12碼，但係上仗絕殺阿仙奴嘅馬奧比操刀被成功捉路嘅卡斯柏舒米高撲出，李城力保不失。臨完上半場，李城後衞蘇恩古頭槌攻門僅僅斜出，兩隊半場互交白卷。下半場李斯特城繼續控制戰局，占士麥迪臣表現活躍，但都入唔到波。踢到補時階段，占美華迪頭槌攻門，白禮頓嘅李維士鄧克疑似犯手球，但球證冇判罰，最終0:0完場。
上場和咗屈福特1:1嘅李城，英超復賽後連續兩場和波，目前以31戰得55分繼續排第3位，領先排第4嘅車路士4分但係踢多賽1場。