熱刺周二喺英超主場迎戰韋斯咸，雖然上半場結束前有孫興民「食詐糊」，但多得「槌仔幫」嘅湯馬士蘇錫克下半場擺烏龍，加上哈利卡尼終於入到個人今年嘅第一球，熱刺輕輕鬆鬆贏2:0，終止咗喺各項賽事七場不勝嘅頹勢。第200次代表熱刺上陣，喺英超累積已經入咗137球嘅卡尼仲話，希望入球數目都可以快啲突破200大關。
冇人睇唔知點慶祝
強陣出擊嘅熱刺今場佔盡優勢，控球率達到65%，但全場15次射門就只有4次中目標。佢哋要到64分鐘，先藉住韋斯咸中場湯馬士蘇錫克嘅烏龍打破僵局，領先1:0。去到82分鐘，哈利卡尼接應孫興民嘅傳送後，單刀喺禁區外起腳，射入個人今年首個入球，為熱刺鎖定2:0勝局。
卡尼喺今年一月接受大腿筋手術後，直到上周五先至喺熱刺1:1賽和曼聯場波復出。對於再次嘗到入波嘅滋味，呢位英格蘭國家隊前鋒就話感覺非常美妙，但由於賽事要閉門進行，觀眾席上乜人都冇，搞到佢都唔知跑去邊度慶祝好。佢仲話其實自己今場有唔少機會，應該可以入多幾球，但最緊要都係幫球隊袋晒三分。
值得一提嘅係，今場係哈利卡尼第200場為熱刺喺英超上陣，而呢個入球亦係佢為球隊入嘅第137個聯賽入球，令佢成為英超史上為單一球隊上陣200場入球第2多嘅球員，同領先嘅阿古路只係差一球。卡尼賽後就話自己只係26歲，仲有大把世界，希望可以盡快喺英超入夠200球，佢又大讚阿古路係英超其中一個最勁揪嘅射手，能夠追到佢咁貼，就證明自己都唔嘢少。
入球率勝兩大射手
翻查紀錄，英超成立至今只有舒利亞同埋朗尼能夠攞到超過200個英超入球，而卡尼喺史上射手榜暫時只係排第13，但其實佢嘅入球效率，原來仲高過呢兩位前輩。連同喺12/13年球季外借到諾域治時踢嘅3場比賽，哈利卡尼用咗203場就入咗137球，即係平均每場入0.68球，而舒利亞同朗尼喺英超生涯嘅平均每場入球，分別就只0.59球同0.42球，可見卡尼只要遠離傷患，就絕對有條件登上英超入球王嘅寶座。