利申，本總裁唔係想挑釁陳智思，而係關心佢健康。話說佢旗下虛擬保險公司Avo，月初出一個題為「你的菊花漂亮嗎？」嘅fb post，第一眼不以為然，以為真係講花；目光轉去配相，係一個切開一半嘅紅肉西柚；再睇內文先知講緊大腸癌保險，切半西柚原來真係「菊花」意思。
Avo文宣design有幾難以想像？從logo已知一二。話說Avo意思係牛油果（Avocado），品牌設定上，佢有幾個朋友包括蘋果、橙、車厘子，全部完好無缺，唯獨Avo切開一半，中間有粒啡色核，感覺唔多舒服。講完外貌，再睇Avo保險產品。呢間由亞洲保險分拆出嚟嘅venture，睇得出希望創新。除典型癌症保、旅保，較特別係新推出嘅「電子錢包保」。
網頁所講，產品係保障金管局旗下Stored Value Facility（SVF，儲值支付工具），包括WeChat Pay、Alipay、PayMe等，若唔小心遺失電話，電郵或SIM卡被hack，從而作未經授權交易，就可獲賠償。保費每年承惠79元，保額1萬元，每次索償上限20%，只得2,000元。
有邊間SVF一年會俾人成功hack五次？唔好講五次，一次已觸動金管局神經，尤其呢幾年非常重視cyber risk，網絡安全出事，仲唔即刻私了間SVF咩。
過去幾年SVF出事，社會回響頗大，如2018年10月出現eDDA（直接付款授權）漏洞，有Alipay同Tap N'Go用戶堅俾黑客偷錢，當時金管局曾背書：「一般而言，若賬戶持有人未有授權相關扣賬，並不需為未經授權交易承擔責任。」
的確，過去無論邊間SVF出現未經授權轉賬，消費者都獲足額賠償，基本上風險由持牌機構承受，又何需「電子錢包保」？
其實險企同客群好少touch point，唔似銀行或券商，市民每日都要接觸。加上做GI（一般保險）業界本身已頗digitalised，至少旅保、家居保好多年前已可上網完成；除非Avo眼光獨到睇到一個藍海未被滿足，但呢刻明顯未見到。
最後係清算政府官員時間。Avo大股東陳智思作為行會召集人，未能阻止林鄭推出一連串令香港崩壞嘅政策，如何叫年輕人幫襯你盤生意？既然Avo問候我菊花，本總裁都想問候陳智思：喺過去粗口聲不絕的一年，你的菊花還漂亮嗎？
程總裁
http://fb.com/IFC89