林鄭呢輪國安法上身，一有機會就斥罵反對國安法者係妖魔化、污名化國安法，違反廣大市民意見。「污名化」呢三個字以前唔見多用，現在高官將「污名化」三隻字多番背誦，大概係學習內地用語。抹黑塗污呢四隻字就係中文，「污名化」就是歐式中文，英文名詞加ize在後面，就變成動詞，例如criminalize（刑事化）、urbanize（城市化）、digitalize（數碼化）等等。翻查網上資料，污名化嘅英文就係stigmatize，本是心理學用語，但內地及香港官員拿來使用，接近「唱衰」嘅意思。講唱衰「國安法」，香港市民立即知道林鄭講乜，但講國安法「污名化」喎，十分論盡，支持林鄭嘅建制派小市民（多是低教育低收入一輩），點會明白究竟呀。
呢日食午飯，與一位國際傳訊總經理講開林鄭用語日益「內地化」，政府聲明日趨「大陸化」，李家超面貌急速「公安化」，張建宗形象日益「幹部化」，大家笑咗一餐，總監話見過公司內地僱員來港參加工作坊（workshop），預先送來發言稿，有四頁紙，總監認為誦讀時間太長，會令工作坊超時，叫佢精簡化，內地僱員幾經辛苦，將四張紙講詞，縮到三張，傳訊總監於是認真閱讀，索性將多餘用字刪除，變成一張半紙，主題及要點全部保留。左丁山話：「你係工作坊主持人，有權咁做縮龍成寸啫，特區政府官員或者仿效內地風格，講寫長夾悶，此謂之劣幣驅逐良幣。」
傳訊總監接觸好多大企業同行，知道一啲大人物去年曾向林鄭力陳修訂逃犯條例會鬧出大風波，唔好去馬，但林鄭認為自己啱晒，堅決去馬，動員商界支持，正是窮不與富敵，富不與官爭，何況呢個女官後面有強權支持，商界人物於是攞番小小讓步後，群起表態支持。後果就係二百萬人上街，其餘就是歷史。
好嘞，現在又來國安法，由港澳辦中聯辦「動員商界」支持，傳訊總監嘆一聲：「你估老闆想作反咩，日日收到電話叫佢表態，唯有發言支持啦，你話王冬勝識做戲，在街站簽名，我好同情佢！我公司老細做美國生意，知道後果嚴重，咪又一樣要我出一紙聲明支持國安法立法！」商界人物係有苦衷嘅，今時今日在香港做大生意，形勢比人強也。
後來晚上碰到惡佬明，佢亦怕咗國安法，但佢老闆在內地有工程，一早叫佢地唔好出聲，自己就表咗態支持。惡佬明話：「我地盤有三分一工人住在深圳，朝早過關回港返工，但受疫情所困，返唔到嚟，搞到我好頭痕，啲工人同我講，理得佢有冇國安法吖，當返咗深圳住咪得囉。他日會拉人，都係拉你地班名嘴寫稿佬嘅啫。」左丁山唯有苦笑。