說陳柏宇是「晒B狂爸」又好，有分享症又好，他說：「唔知喎，我又冇乜理人點睇！」他只想為愛女記錄成長每一幕，正如訪問當日，原來是Abigail第一次學識講yes，已教陳柏宇難忘。
「啱啱今日先學識講yes，今日撳YouTube，問佢睇呢條片好冇呀，佢就no no no，去到佢想睇嗰條片，佢就講yes喎！唔係我教佢講，今次係我第一次，佢自己自發性講yes！」
陳柏宇自言已經為女兒的未來計劃好，待她7歲的時候就到加拿大生活，「加拿大多啲綠色，多啲花草樹木，大家無論有錢好冇錢好，你都係住一間屋，個個都揸車個個都有車，個感覺我覺得會舒服啲囉！」父親節點慶祝？「簡單喺屋企食餐飯。」
撰文：文嘉龍
攝影：周樂恒
曾住兒童院缺父愛
囡囡Abigail今年9月兩歲，當了爸爸快兩年的陳柏宇，爸前爸後最大分別，是人生計劃開始諗得長遠，「生咗小朋友，你個目標係明確少少㗎，會諗點樣去安排佢嘅路。譬如我哋想佢幾多歲就返去加拿大，喺嗰邊讀書生活！因為我喜歡嗰邊教學模式、嗰邊啲人嘅思想、嗰度嘅空間感！」
陳柏宇7歲移民加拿大，所以他也希望囡囡能跟自己一樣，「𠵱家暫時計劃係咁，媽媽就一定跟啦，我希望都可以跟到，如果跟唔到，我咪兩邊飛囉，一個月喺香港、一個月喺加拿大，到時再慢慢決定！」
萬事為囡囡鋪路，陳柏宇兒時卻沒有得到爸爸的照顧。父母在他3歲時離異，陳柏宇入住聖基道兒童院生活，到7歲才跟媽媽和外公移民加拿大，父親節一直與父親無緣，「冇同爸爸慶祝過，但係同我阿公慶祝囉，我喺加拿大同阿公住，同阿公阿婆屋企人一齊食餐飯。」
與父親的關係，陳柏宇說：「我7歲已經移民加拿大，我3歲住兒童院，可以有幾熟啫？我爸爸又冇去加拿大！我唔會打聽佢行蹤，有人話畀我聽我咪會知，不過唔係有好多我嘅親戚會同佢有接觸！」想見爸爸？「你點會恨見一個唔係太認識嘅人，純粹有個血緣關係咁解。」
不見不見還是見，就在陳柏宇2005年回港準備入行之時，「我啱啱返嚟香港有見過，喺我屋企樓下見咗十分鐘，佢問我借咗兩嚿水，我嗰時有先至畀到佢，冇，我都冇辦法！」陳柏宇說：「我爸爸絕對係一個，令到我自己做爸爸要有乜嘢要求嘅原因！我對我小朋友特別好嘅原因，係我知道對小朋友好，係應該㗎！你生個小朋友出嚟，係應該要照顧佢哋，係應該要畀愛心要畀耐性教導佢哋。教導嘅模式都有好多種，點樣教係一個重點，唔係話你打佢鬧佢為佢好，就叫做教，教都有好多種方法，呢啲亦都唔係因為我爸爸唔做，所以我覺得要做，係因為我舅父佢哋有做，所以我覺得要做囉！」
面對愛女Abigail，有很多難忘的第一次，「譬如佢第一次行嘅時候，就係工人姐姐睇住教佢行，工人姐姐就拍低咗；第一次講『爸爸』就冇意思㗎嘛，其實佢唔係嗌你爸爸，佢只不過發個音出嚟啫！咁啱係上年母親節，佢嗌『爸爸』，發音嚟啫，佢唔係稱呼我，𠵱家佢都會有陣時嗌第二啲人做『爸爸』㗎，不過佢知道爸爸係我！」
做慣慈父角色的陳柏宇，對女兒未來的期望很簡單，「好人，好人就夠喇！」
【後記】搵日飲酒
在現場精靈可愛的Abigail，被爸爸一手抱住最開心，立即笑個不停。全天候陪住女兒，陳柏宇說：「生活上有好多決定都同小朋友有關，譬如我出街，咁邊個睇住個女呢？又或者如果夜晚出去玩，朝頭早點樣起身去照顧阿女呢？」
夜蒲飲酒的日子，離他很遠了，「冇咗好耐啦，自從佢出咗世之後，都係去過一次半次，佢媽媽呢幾日話，不如我哋搵日去飲酒，抌低Abi，哈哈！你會覺得以前係好好玩，係咪搞到我𠵱家好想出去飲酒，又唔係，因為我又好唔鍾意hangover（宿醉）嘅感覺，又傷聲又湊唔到女！」
雖則陳柏宇和太太符曉薇因為拍《喜愛夜蒲》結緣，戲名嚟啫，如今兩公婆，湊女最重要！
場地提供：Teppanyaki Kaika（The ONE）