袁彌明（Erica）的父母早年仳離，她與兄姊從小跟着媽咪生活，商人爸爸袁弓夷生活上很照顧子女，彼此關係良好，他雖然緊張子女的學業成績，但思想和發展則有很大自由度。Erica自幼受爸爸薰陶，父女間不但沒有代溝，上至談政論經，下至閒話家常都非常啱key，天天都是他們的父親節。
Erica近年有見爸爸年紀漸長，筋骨變硬，就堅持要帶他一齊去做瑜伽，操弗爹哋。訪問當天，父女齊齊穿上運動服，在瑜伽導師Peggy指導下做出不少拉筋動作。孻女拉心肝，71歲的袁爸爸特別痛錫Erica：「佢係我細女梗係錫，細個冇照顧過佢，見佢咁有大志，佢喺做生意同政見都好好，如果唔支持佢，點算係老竇。」Erica聽後說：「佢會灌輸仔女思想同理念，對我哋學業要求好高，佢注重教育，要我哋講好啲英文，入間好學校，要我哋有獨立思考同要有智慧，佢唔係要我哋去學點樣慳水慳力，佢要我哋有大志向，佢教我哋點理財，佢對每個仔女都有一段時間財政封鎖，連交學費都要打電話返嚟香港求佢。」
當年面對爸爸經濟封鎖，Erica就趁課餘賺外快，袁爸爸說：「佢好彩讀書時喺餐廳打過工，呢個比讀乜嘢都緊要，佢哋知道錢嘅價值，香港大把有錢人，畀張卡外國讀書嘅仔女，佢哋懂得錢咩？有時候仲要耐唔耐閂水喉。」Erica在港讀中學就做兼職模特兒賺零用，她說：「我中學時做model賺咗少少錢，喺美國讀高中時都使晒，爸爸同我交學費，媽咪好慳，佢畀嘅生活費啱啱好，一蚊都冇剩，我鍾意買衫、買袋、買耳環，惟有自己去餐廳打工，自己賺錢自己使。」
袁爸爸近日連番發表「深黃」政見撐年輕人，令網民深表敬佩，兩父女都抗拒共產黨，Erica因為由嫲嫲口中聽過她文革被批鬥的經歷：「嫲嫲喺大陸坐過20年，我媽咪爹哋都喺美國讀大學，喺美國讀書一定要讀佢哋嘅歷史、馬丁路德金嘅事，讀世界歷史又一定知甘地，冇人會覺佢哋唔啱，呢啲觀念，唔會細個有，大個會冇。冇人會唔鍾意自由同唔鍾意講真話，即使冇受過好多教育，亦唔會抗拒呢啲普世價值。」
撰文：比華利
攝影：林賓尼
場地：Yoga Refine