美國著名投資者Kyle Bass來自德州，政治理念上強烈反共，最有趣之處，就係網上有資料話佢管理嘅投資基金Hayman Capital Management曾有投資者來自中國大陸，係一間高科技公司。巴斯有投資天份，28歲就做咗Bear Stearns（金融海嘯時執笠）嘅高級常務董事，係公司歷史上最年輕之人得到呢個職銜，不過後來巴斯之投資成績好一般，除咗在2007年準確預測次按危機，名利兼收之外，就冇乜特別亮眼的表現，今次大張旗鼓咁話集資沽空港元，都唔知有冇外國投資者聽佢支笛，但政治上，巴斯屬特朗普陣營，佢有一位密切接觸者更加係特朗普昔日之打獵拍檔，支持特朗普不遺餘力，巴斯沽空人民幣之後，呢位老友Tom Hicks曾安排巴斯與美國財政部官員會面，唱衰中國經濟。
有咁嘅背景，巴斯唔算得係投機大鱷，難與索羅斯相比，但佢有冇甚麼內幕消息，外人點會知吖。
從前港英時代，不少高官或官方機構行政總裁都係外籍人，以英國人為主，除咗有歷史因素之外，洋人官員應付洋人投資者／投機享有些少好處，就係同聲同氣，易於解釋香港情況。回歸後，洋官已幾近絕迹，但證監會行政總裁一直由外人擔任，沈聯濤（馬來西亞人）、韋奕禮及現時嘅歐達禮皆是，今年歐達禮曾於去年九月話2020年10月任滿後就離職，點知今年5月18日政府再次委任歐達禮，任期至2023年。歐達禮之後出席網上論壇，就講及香港聯繫匯率制度極穩健，未見有資金外流情況，顯然就係講畀洋人投機者聽嘅，佢仲有一句話可圈可點，就係香港須致力維持能令外國投資者完全熟悉的模式去運作，即是暗示香港行政及法治制度如果改變到令外人不大熟悉，會有後果，唔知林鄭、中聯辦、港澳辦聽唔聽得明呢？歐達禮去年宣佈會離開後，市場傳出大熱門候任人選會係副行政總裁梁鳳儀，點知歐達禮唔嫁又嫁，彭博報導，北京要求歐達禮留任，係希望減低港版國安法對香港金融界市場嘅影響喎！左丁山對此說半信半疑，中國展開戰狼外交之際，點解要一個洋人面孔代表香港股票市場呀，有損中國人自信心嘅噃。另一說就係證監會頂頭上司係財庫局，林鄭換咗局長，新局長許正宇年紀輕，經驗淺，李小加又講明年退任，特區政府唔想一下子換晒三個人，故此叫歐達禮續任。還有一項由消息人士透露，歐達禮本來想返倫敦做FCA總裁，點知發生疫情，英國唔想換人，歐達禮知道暫時返唔到倫敦，於是請求政府再畀佢繼續做落去，正中政府下懷，於是順水推舟，同佢再傾條件，搞掂咗佢！