在置地廣場聽完分析H講疫情之下，大公司分A、B隊返工之後，行路去IFC，一路行，一路諗，大公司被疫情所逼，拆散公司僱員，分批返公司上班，主要靠電腦（雲端儲藏公司資料畀僱員使用），靠開會軟件（有好幾款，目前最多人用嘅可能係Zoom，金融時報報導在4月頂峰時間，全球每日有三億人用Zoom開會）。
問題來了，如目前返工模式得以長期化，如果你係大集團揸弗人，在面對全球競爭激烈，必須爭取市場，防止傳染病，削減成本嘅環境下，你下一步會點做？好可能發生嘅一件事就係，一班人在元朗、一班人在將軍澳，老闆在淺水灣，另有人在中環寫字樓返工，大家照舊做事。假如發揮正常，減咗寫字樓成本，照樣效率好，繼續賺錢嘅話，不如將部分工作分配去菲律賓、印度、馬來西亞、印尼啦，喺呢啲國家每處聘請30至50名僱員在家上班，代替香港高人工、高租金，照樣用Zoom開會，有乜唔妥？另外機械人唔會染上肺炎，唔會傳染或被傳染，一定唔須要隔離避疫，盡量用多啲機械人分析財務報表，做會計，有何不可？
諗到呢點，心有涼意，戴住個口罩行路都唔覺得熱，一場C19迫使全世界封國封關封城，所有企業被逼思考用新方法辦公、避疫，以致世界再不會一樣了，以後年青畢業生如何適應新社會、新工作模式？左丁山老矣，已追唔上時代科技，唔識講。
不過用正向思維（positive thinking）處事嘅話，年青人學習Eric Yuan（袁征）啦，呢位Zoom創辦人，九年前還是寂寂無聞，依家因為Zoom大受歡迎，股價大漲至200美元，以袁征在IPO時持有22%股權計算，身家已有近1,000億港元，成為美國矽谷新貴，最令人羨慕嘅美籍華人創業家。佢出生於山東，1997年移民去美國，英文唔掂，至今23年啫，今年50歲，已舉世知名。佢與其他中國科技富豪（馬雲、馬化騰、雷軍、劉強東、丁磊、李彥宏等）不同，就係公開承認在2007年入籍美國係美國人，心目中嘅英雄係高比拜恩，伊古達拿（Zoom投資者）及達拉斯小牛隊（現改名為獨行俠）嘅班主Mark Cuban，喜歡美國生活，有孩子在美國出生，認同美國文化！中國美國交惡之際，Zoom受華府懷疑在所難免，加上Zoom有三分一研發人士係在中國大陸工作嘅，更加引起美國之「安全憂慮」，睇怕袁征更要加大力度美國化，不斷強調自己親近美國，引致胡錫進鬧佢，數典忘祖，咁就成功啦，起碼做美國企業家，唔會畀美國政府要求「英年退休」先啦！
但偏偏中國政府還是要玩死你，迫Zoom取消王丹、李卓人、周鋒鎖之戶口，令網上六四紀念停播，袁征呢次變成「中美不是人」，如應付不當，Zoom前途不妙。