反送中抗暴之戰一直有賴唔少香港人打國際線，令外國人知香港發生乜事。有港人就搜集本地抗爭嘅科技應用，撰寫報告送去奧地利新媒體電子藝術中心參賽，結果奪得數碼藝術大獎入面「數碼社區」組別金獎，評審仲係首次將金獎頒畀匿名得獎者，就係「香港抗爭者」！
報告由駐日香港藝術家蕭子文（Eric）同香港策展人鄺佳玲（Joel）編寫，叫「Be Water by Hong Kongers」，透過整理香港人喺抗爭中靈活運用科技，包括連登同Telegram、透過蘋果AirDrop發佈文宣、創作《願榮光歸香港》歌曲等，令評審大讚港人民主運動體現咗李小龍口中嘅「無形無狀」。
Eric知道獲獎後話，呢個獎係屬於每一位為捍衞民主奮鬥嘅香港人，港人面對政權連番打壓抗爭，堅持發掘新通訊同文宣媒介值得世界認可。呢個獎有一萬歐元獎金，並會喺奧地利新媒體藝術節展出， Eric同Joel話會將獎金用於準備藝術節展覽，包括展品製作及購買展覽器材，期望將香港抗爭藝術帶到世界巡迴展出。