自從有咗C19之後，大公司紛紛採用輪班制，將不同部門人員分成A Team，B Team，或者係藍隊黃隊，紅隊綠隊，不同隊伍分批返公司上班，例如A隊返6月1日至12號，B隊人員在家工作，到6月15號，B隊返回公司，A隊人員留家工作。交接期間，即6月13號至6月14號，清潔人員在公司徹底清潔消毒，以保證假如A隊有病菌，不會傳染畀B隊，租用大面積寫字樓嘅公司，更加會在寫字樓內劃分社交距離，同事再不能好似2019年咁，坐得相當親近。
分析H現時就係如此返工，左丁山行經置地廣場時，見到佢，問佢輪流返回寫字樓有乜唔習慣，佢話：「最表面麻煩就係在家同同事開視像會議時，一打開Zoom，屋企嘅混亂場面就驚住畀同事睇到。你估人人都好似英國CNBC班主持咁，在家工作，個個畀人睇到佢地屋企有個大廳或者大書房咩，我地香港人住細屋居多，有啲景物係不宜入鏡頭㗎！」咁又係，香港家庭最缺乏書房，開網上會議時，兒女在家吵鬧就已經夠晒尷尬。中大新亞書院最近推出「虛擬背景」畀教職員授課應用，開網上會議時，可用新亞圓形廣場、新亞園景等等作為背景，避免家庭實景上鏡。分析H話：「我地公司最近都製作咗有公司logo嘅虛擬背景，但呢啲都係技術問題箒，深入一啲講，分A隊B隊其實不利公司員工team spirit，新人更蝕底，可能上班半年，都唔認識另一個部門嘅成員，街上碰頭不知對方是誰，冇晒同事感情，互相照應或者老鬼提攜新秀。有啲公司更先進，乘機搞數碼辦公室（Digital Office），除基本人手外，分析員、營銷員、會計部，可全部在家工作，如要返公司，就完全冇房間，所有寫字枱冇櫃桶，只有電腦，返公司前要預先book一張寫字枱，公司會派部手提電腦及iPad，一人一部。如此形式，根本唔駛分AB Team，你鍾意返就返。如果你係新僱員，返到公司都唔識乜頭乜路，同事情緣更加淡薄。」如此講法，甲級商廈想唔減租都唔得，面積需求減少吖嘛。以後呢個社會更加隔離，疏離，以左丁山經驗，年青時最好嘅朋友就係同學，畢業後各散東西，最好嘅朋友變成係公司同事，假如一齊工作二三十年，夾得埋嘅話，更會情如手足，反而啲同學唔見三十年，重逢只能回憶幾句哈哈哈。因疫情及Zoom電腦科技帶來嘅轉變，將會令人與人之間嘅網絡更加線上化，流於表面，不是君子，也是相交淡如水，彼此交往會更趨於利益化，「君不懼社交距離而來，亦有利於吾乎？」如果陳健民教授仍然在教書，不妨開一科「Sociology of the Workplace in the Digital Age, Post-Covid 19」。