盛傳車路士就喺今日啟動RB萊比錫前鋒迪姆華拿值價5,300萬鎊（約5億港元）嘅買斷條款。𠵱家喺阿仙奴踢正選嘅德國門將賓特尼奴認為，日內可能正式上「車」嘅同胞迪姆華拿，一定可以適應英超。尼奴就話：「我好熟悉佢嘅能力，同佢關係都好好，我當然歡迎佢嚟到倫敦啦！車路士係一個好選擇，呢樣係唔使懷疑嘅。」不過，呢位兵工廠門將相信華拿會成為英超各隊嘅潛在威脅：「英超比賽節奏好快，比德甲更加體力化，但我認為佢冇問題，因為佢本身就係速度快嘅球員，而佢嘅質素加上射手嘅觸覺，我只可以講車路士會變得更勁。」至於RB萊比錫教練尼高斯曼喺球隊上周五贏完賀芬咸嘅賽後，對留住華拿打定輸數：「我唔預佢下季仲喺度踢喇。」