香港人同暴政誓不兩立，仲成為全球對抗中共極權嘅橋頭堡，抗爭手足輸出革命，抗爭手法為外國示威活動帶嚟唔少啟發，唔只令國際對香港人另眼相看，仲等大家同國際社會真connect。
喺呢個非常時期，講述05年法國騷亂嘅電影《孤城淚》（Les Miserables）喺香港上畫，內容係大家最有共鳴嘅反警暴，八方知道有唔少手足都入場睇，令電影唔經唔覺已經累收300萬票房，有望成為香港史上票房第六高嘅法語電影。
目標超越300萬
雖然《孤城淚》法國合資者兼發行商Le Pacte無直接明示支持香港抗爭，但曾經講過，香港嘅抗爭運動係為咗爭取自由；導演萊奇里（Ladj Ly）企得更前，曾經出聲支持香港示威者，仲話如果政府冇做好自己份工，咁民眾上街示威係好正常，又話暴力有時係別無選擇，所以連登有巴打呼籲，香港手足要繼續幫海外手足，總之行動目標，就係要令《孤城淚》香港票房超過300萬。
法國政府文化部嘅旗下機構UniFrance，呢個周末就喺Twitter出帖，話《孤城淚》喺香港票房成功，已經成為自2012年嘅《星光夢裏人》同《閃亮人生》後，香港票房最高嘅法國電影，亦畀國際見到香港嘅「黃色經濟圈」真係有料到。